Hamasi ka marrë një projektpropozim nga bisedimet e armëpushimit për luftës në Gaza në Paris për një ndalim në operacionet ushtarake dhe shkëmbimin e të burgosurve palestinezë për pengjet izraelite, tha të martën një burim i lartë pranë bisedimeve.
Presidenti i SHBA-së Joe Biden tha se Izraeli ka pranuar të ndalojë veprimet ushtarake në Gaza për muajin e shenjtë mysliman të Ramazanit, ndërsa grupi islamik studion projektpropozimin.
Bazuar në një deklaratë të dhënë për Reuters nga burimi, projektpropozimi për fazën e parë të marrëveshjes do zgjaste 40 ditë dhe shkëmbimi i të burgosurve palestinezë me pengjet izrarlite do ishte në një raport të përgjithshëm 10 me 1.
Gjithashtu në propozim përfshihen:
* Të dyja palët ndalojnë plotësisht operacionet e tyre ushtarake.
* Operacionet e zbulimit ajror mbi Gaza do ndalen për tetë orë në ditë.
* Të gjithë pengjet izraelitë, duke përfshirë gratë, fëmijët nën 19 vjeç, të moshuarit 50 vjeç e lart dhe të sëmurët, duhet të lirohen në këmbim të një numri të caktuar të burgosurish palestinezë sipas numrave të renditur më poshtë.
* Në këmbim të 40 pengjeve të listuara në kategorinë humanitare, rreth 400 të burgosur palestinezë do të lirohen, sipas raportit 10 të burgosur me 1 peng.
* Kthimi gradual i të gjithë civilëve të zhvendosur – përveç meshkujve të moshës së shërbimit ushtarak – në Rripin verior të Gazës.
* Pas fillimit të fazës së parë, Izraeli do ripozicionojë forcat e tij larg zonave me popullsi të dendur në Rripin e Gazës.
* Angazhimi për të sjellë 500 kamionë në ditë ndihma humanitare.
* Angazhimi për sigurimin e 200,000 tendave dhe 60,000 karvanëve.
* Lejimi i rehabilitimit të spitaleve dhe furrave të bukës në Gaza, duke përfshirë lejimin e menjëhershëm të hyrjes së pajisjeve të nevojshme dhe sigurimin e dërgesave të karburantit për këto qëllime, sipas sasive që do bien dakord.
* Izraeli pranon hyrjen e makinerive dhe pajisjeve të rënda për të hequr rrënojat dhe për të ndihmuar me qëllime të tjera humanitare, me sigurimin e dërgesave të karburanteve të nevojshme për këto qëllime, sipas sasive që do bien dakord, me kusht që ato të rriten me kalimin e kohës. Hamasi zotohet të mos i përdorë këto makineri dhe pajisje për të kërcënuar Izraelin.
* Marrëveshjet e rënë dakord në fazën e parë nuk do zbatohen për fazën e dytë, e cila do t’i nënshtrohet negociatave të veçanta të mëvonshme.
