Votuesit amerikanë kanë shprehur sërish shqetësime për moshën e Joe Biden, sipas gjetjeve të një sondazhi të fundit, megjithatë, presidenti sipas kompanisë që bëri sondazhin, është përpara ndaj Donald Trump-it.
Sondazhi i Universitetit Quinnipiac me 1,421 votues të regjistruar, i kryer midis 15 dhe 19 shkurtit dhe i publikuar të mërkurën, zbuloi se 49% e të anketuarve favorizuan Biden në një revansh hipotetik presidencial me Trump, një përparësi katër pikë ndaj kandidatit të mundshëm republikan, i cili u mbështet nga 45%.
Megjithatë, 67% e votuesve thanë se 81-vjeçari Biden është “shumë i vjetër për të shërbyer efektivisht për një mandat tjetër katërvjeçar në Shtëpinë e Bardhë”. 57% kishin të njëjtin mendim për 77-vjeçarin Trump.
Të dy kandidatët presidencialë kanë hedhur poshtë shqetësimet e fundit për moshën e tyre të madhe.
Biden iu përgjigj me zemërim raportit të këshilltarit të posaçëm Robert Hur në fillim të këtij muaji lidhur me keqpërdorimin e supozuar të dokumenteve të klasifikuara, i cili tha se ai është një “i moshuar me qëllime të mira me kujtesë të dobët”, duke u thënë gazetarëve në Shtëpinë e Bardhë se “unë e di se çfarë jam duke bërë.”
Në fillim të këtij muaji, ish-mjeku i Shtëpisë së Bardhë dhe përfaqësuesi aktual republikan i Teksasit, Ronny Jackson, së bashku me 83 ligjvënës të tjerë republikanë, shprehën “shqetësime të mëdha” për aftësitë mendore të Biden.
