Importuesi më i madh gjerman i gazit ‘Uniper’ tha të mërkurën se po kërkon miliarda euro kompensim nga Gazprom i Rusisë për gazin natyror të padërguar dhe ka hapur një proces arbitrazhi.
Sipas kompanisë së shpejti që do shtetëzohet, zëvendësimi i furnizimeve ruse i ka kushtuar asaj rreth 11.6 miliardë euro (12.02 miliardë dollarë) deri më tani, me shifrën që pritet të rritet deri në fund të 2024.
“Ne po kërkojmë rikuperimin e dëmeve tona të konsiderueshme financiare në këto procedura. Bëhet fjalë për vëllimet e gazit që janë rënë dakord kontraktualisht me Gazprom, por nuk janë dorëzuar dhe për të cilat ne duhej të blinim zëvendësime me çmime jashtëzakonisht të larta të tregut dhe ende duhet ta bëjmë këtë.” – tha shefi ekzekutiv i Uniper, Klaus-Dieter Maubach.
Gazprom Export i Rusisë konfirmoi se Uniper ka nisur procedurat e arbitrazhit, duke thënë, megjithatë, se nuk njeh shkeljen e kontratave ose legjitimitetin e pretendimeve të deklaruara për dëme.
Rusia fillimisht ia atribuoi uljen e dërgesave me mirëmbajtjen e turbinave në gazsjellësin Nord Stream 1, të cilat u ndërprenë për shkak të sanksioneve të vendosura nga vendet perëndimore. Një pjesë e tubacionit u hodh në erë më pas në shtator, duke e bërë atë të pafuqishëm.
Kompania gjermane njoftoi gjithashtu se ka vendosur të distancohet sa më shumë që të jetë e mundur, ligjërisht dhe në aspektin e personelit, nga njësia e saj e biznesit ruse Unipro.
Uniper ishte në prag të falimentimit për shkak të rritjes së çmimeve të energjisë dhe ndalimit të rrjedhave të gazit nga furnizuesi kryesor i saj Rusia. Në fillim të këtij muaji ajo raportoi një humbje neto marramendëse prej 40 miliardë euro (42 miliardë dollarë) deri në shtator. Kompania tani po kërkon një ndihmë prej 53 miliardë dollarësh nga qeveria gjermane si pjesë e shtetëzimit të saj.
