Vendosni fjalën kyçe....

“Rashi Sanook” – Gafa e radhës e Joe Bidenit, i ngatërron emrin kryeministrit britanik


Gafat gjatë fjalimeve publike tanimë janë kthyer në diçka normale për presidentin e SHBA-ve Joe Biden.

Ditën e djeshme, ai shqiptoi gabim emrin e kryeministrit të ri të Mbretërisë së Bashkuar Rishi Sunak.

“Vetëm sot, ne kemi lajme se Rashi, Rashi Sanook është tani kryeministër.”- i tha ai audiencës në një event në Shtëpinë e Bardhë që shënonte festivalin hindu të Diwali.

“Mjaft befasuese.”- vazhdoi Biden. “Një moment historik novator. Dhe ka rëndësi, ka rëndësi.”

Sunak është kryeministri i parë britanik me prejardhje aziatike dhe po ashtu kryeministri i parë hindu.

Prindërit hindu të Sunak, të cilët ishin fëmijë nga familjeje indiane, kanë lindur në Kenia dhe Tanzani përpara se të emigronin në Mbretërinë e Bashkuar.

Biden u ka mbijetuar disa gafave gjatë kohës së tij në detyrë. Në një rast zëvendëspresidenten e tij Kamala Harris e quajti “presidente” dhe në një tjetër rast “zonja e parë“. Në një event në Shtëpinë e Bardhë në fillim të tetorit, ai pyeti se ku ishte kongresmenja Jackie Walorski, e cila kishte ndërruar jetë dy muaj më parë.