Policia e Zelandës së Re u përplas me protestuesit jashtë Parlamentit në Wellington të enjten, duke arrestuar më shumë se 50 persona pasi shpërndau me forcë demonstratën kundër kufizimeve të Covid-19.
Pak para se të shpërthente përleshja, policia kërcënoi turmën prej rreth 150 protestuesish me arrestim nëse ata kundërshtonin të largoheshin vullnetarisht nga zona. Ata që e shpërfillën urdhrin u arrestuan më pas nga forcat e rendit.
Protestuesit mund të shiheshin duke brohoritur ‘kjo nuk është demokraci’ dhe ‘turp për ju’ ndërsa oficerët e policisë hynë për të pastruar terrenin.
Pamjet treguan oficerët e policisë duke shembur tendat që ishin ngritur nga protestuesit dhe duke u përleshur me protestuesit që nuk dëshironin të shpërndaheshin vetë.
“Policia vazhdon t’u bëjë thirrje protestuesve që të largohen paqësisht nga ambientet e Parlamentit, pasi zona është e mbyllur për publikun,” tha policia e Zelandës së Re në një deklaratë të enjten.
“Ne vazhdojmë të njohim të drejtat e njerëzve për të protestuar, megjithatë ata që sillen në mënyrë të paligjshme do të përballen me arrestimin”, vazhdoi deklarata.
Deri në orën 11:30 të mëngjesit, Policia e Zelandës së Re pretendoi se kishte arrestuar më shumë se 50 protestues me akuza të tilla si shkelja e kufirit dhe pengimi për të qëndruar në ambientet e Parlamentit pasi dekretoi zonën të mbyllur për publikun.
Protestuesit filluan të bllokojnë rrugët përreth Parlamentit të Zelandës së Re të martën në shenjë solidariteti me kamionistët dhe mbështetësit e tyre në Otava, Kanada, të cilët aktualisht po protestojnë kundër kufizimeve dhe pasaportave të vaksinave jashtë Parlamentit Kanadez, si dhe në kufirin SHBA-Kanada.
Protestuesit e Zelandës së Re kundërshtojnë gjithashtu kufizimet e Covid-19 në vendin e tyre, të cilat përfshijnë vaksinimin e detyrueshëm për disa profesione, duke përfshirë shëndetin, arsimin, shërbimet e urgjencës dhe mbrojtjen.
