Dy ministra holandezë kanë paraqitur një amendament në parlament që do të heqë kufirin e moshës dhe deklaratën e ekspertit, për të thjeshtuar ndryshimin e gjinisë në certifikatat e lindjes, pas presionit nga grupet transgjinore.
Ndryshimi legjislativ në Aktin Transgjinor u paraqit nga ministri i Mbrojtjes Ligjore dhe ministri i Emancipimit në Dhomën e Ulët të Parlamentit.
“Personat, identiteti gjinor i të cilëve nuk korrespondon me seksin e përcaktuar në lindje, në kushte të caktuara mund të ndryshojnë gjininë e tyre në certifikatën e lindjes”, thotë një njoftim i botuar në faqen e internetit të qeverisë holandeze.
Sipas deklaratës, më shumë njerëz duan të ndryshojnë regjistrimin e tyre gjinor, me numrat që janë rritur nga 460 në vitin 2016 në 640 në vitin 2018. Ndryshimi u paraqit në mënyrë që ‘të bënte drejtësi për emancipimin e njerëzve transgjinorë’.
Ministrat sugjerojnë heqjen e kërkesës lidhur me një deklaratë ekspertësh në të cilën një mjek ose psikolog vërteton faktin e një bindjeje të qëndrueshme për përkatësinë e gjinisë së kundërt. Deklarata thotë se grupet transgjinore e konsiderojnë këtë kërkesë si shkelje të së drejtës së individëve për vetëvendosje.
Procedura e thjeshtuar do të përfshinte paraqitjen me shkrim të dëshirës për të ndryshuar regjistrimin gjinor dhe konfirmimin katër deri në 12 javë më vonë.
Legjislacioni i propozuar gjithashtu do të heqë kufirin e moshës, në mënyrë që fëmijët nën moshën 16 vjeç të ndryshojnë regjistrimin e tyre gjinor.