Policia ka vënë nën hetim 15 qytetarë të cilët protestuan një ditë më parë kundër vendimit të qeverisë për vendosjen e detyrueshme të maskave jashtë ambienteve të shtëpisë.
Përmes një njoftimi, policia thotë se këta persona janë gjobitur gjithashtu në zbatim të aktit normative.
“Nga specialistët për Hetimin e Krimit në Komisariatin e Policisë Nr.2, filloi procedimi penal ndaj 15 shtetasve, pasi ditën e djeshme në bulevardin ‘Dëshmorët e Kombit’ kanë organizuar dhe protestuar në kundërshtim me masat anti-covid. Gjithashtu në zbatim të Aktit Normativ, shërbimet e Policisë kanë proceduar me masat administrative përkatëse gjobë për 15 shtetasit”, thuhet në njoftimin e policisë.
Mbrëmjen e kaluar rreth 50 persona janë mbledhur përpara godinës së Kryeministrisë në Tiranë, për të protestuar kundër vendimit të qeverisë për vendosjen e maskave dhe në ambientet e jashtme. Policia ndërhyri për të shpërndarë protestën, ndërsa u shoqëruan në komisariat disa protestues.
