Policia ka nisur procedimin penal ndaj 45-vjeçarit i cili akuzohet se ditën e djeshme ka dhunuar fizikisht një mjek të Urgjencës së Infektivit në QSUT.
Sipas policisë, autori i dyshuar ka dhunuar mjekun dhe më pas është larguar nga spitali.
Ai është shpallur në kërkim dhe akuzohet për veprën “goditje për shkak të detyrës”. Ministrja e Shëndetësisë e dënoi dhunën e ushtruar dhe kërkoi marrjen e menjëhershme të masave dhe dënimin e personit në fjalë.
“Nga ana e Specialistëve për Hetimin e Krimit në Komisariatin e Policisë nr. 4, filloi procedimi penal për veprën penale “Goditje pë shkak të detyrës”, në ngarkim të shtetasit A.M, 45 vjeç, banues në Tiranë.
Ky shtetas rreth orës 13:30, të datës 10.02.2019, pasi ka shkuar për të vizituar një të afërmin e tij që ndodhej i shtruar në spital, në ambientet e urgjencës së Spitalit Infektiv, ka goditur me grusht për shkak të detyrës, mjekun e urgjencës.
Shërbimet e Komisariatit të Policisë nr.4, pasi kanë marrrë njoftim kanë shkuar menjëherë në ambjentet e urgjencës ku dhe kanë kryer të gjitha veprimet proceduriale.
Shtetasi A. M., pasi kishte goditur mjekun ishte larguar nga spitali dhe po vijon puna nga ana e Policisë për gjetjen dhe ndalimin e tij.
Materialet proceduriale i janë përcjellë Prokurorisë së Rrethit Gjyqësor Tiranë për veprime të mëtejshme.” – thuhet në njoftimin e policisë.
