Zëdhënësi i Shtabit Qendror Khatam al-Anbia të Iranit paralajmëroi se akti i fundit i “piraterisë” nga forcat ushtarake amerikane kundër një anijeje tregtare iraniane së shpejti do të përballet me hakmarrje.
“Shtetet e Bashkuara duke shkelur armëpushimin dhe duke u angazhuar në banditizëm detar, sulmuan një nga anijet tregtare të Iranit në ujërat e Detit të Omanit duke hapur zjarr ndaj saj, duke çaktivizuar sistemin e saj të navigimit dhe duke vendosur një numër marinsash terroristë në kuvertën e anijes”, tha zëdhënësi.
“Ne paralajmërojmë se Forcat e Armatosura të Republikës Islamike të Iranit së shpejti do të reagojnë dhe do të hakmerren për këtë akt piraterie dhe agresioni të armatosur nga ushtria amerikane”, shtoi ai.
Paralajmërimi i tij erdhi pasi anija iraniane e kontejnerëve “Tousak” që lundronte nga Kina për në Iran u sulmua nga forcat terroriste amerikane në Gjirin e Omanit të dielën në mbrëmje, shkruan agjensia e lajmeve Tasnim.
Komanda Qendrore e SHBA-së tha se anija po shkonte drejt portit iranian të Bandar Abbas dhe pretendoi se kishte injoruar paralajmërimet e shumta të SHBA-së gjatë gjashtë orëve për të evakuuar dhomën e motorëve.
Presidenti amerikan tha se Marina Amerikane e ndaloi anijen duke hapur një vrimë në dhomën e motorit të saj.
Pas sulmit, forcat ushtarake iraniane nisën sulme me dronë drejt disa anijeve ushtarake amerikane në zonë në përgjigje.
Zhvillimi vjen në mes të një ngërçi në Ngushticën e Hormuzit, një pikë kyçe për transportin e rreth një të pestës së naftës botërore, mes kërcënimeve nga një bllokadë amerikane ndaj anijeve që shkojnë dhe vijnë nga portet iraniane.
