Qeveria e Kubës u përpoq të hapte një kanal të drejtpërdrejtë komunikimi me presidentin amerikan Donald Trump, duke përdorur një biznesmen privat për të dorëzuar një letër të vulosur në Shtëpinë e Bardhë, raportoi The Wall Street Journal, duke cituar burime.
Mesazhi, i cili përfundimisht u ndalua, synonte të anashkalonte Sekretarin e Shtetit Marco Rubio, i cili ka ndjekur një politikë presioni maksimal ndaj Havanës.
Sipas raportit, iniciativa u organizua nga Raúl Rodríguez Castro, nipi dhe ndihmësi kryesor i ish-presidentit kuban Raúl Castro. Letra mbante vulë zyrtare të qeverisë kubane dhe ishte formatuar si një notë diplomatike.
Letra përfshinte propozime për marrëveshje ekonomike dhe investime, kërkesa për lehtësim sanksionesh dhe paralajmëronte se Havana po përgatitej për një inkursion të mundshëm ushtarak nga SHBA, sipas një zyrtari amerikan.
Korrieri, biznesmeni kuban Roberto Carlos Chamizo Gonzalez, u ndalua nga autoritetet në aeroportin e Miamit, ku letra u konfiskua dhe ai u kthye në Kubë, duke i dhënë fund përpjekjes.
Analistët e interpretuan këtë si një përpjekje për të anashkaluar Rubion dhe për t’i dërguar mesazh direkt Trump-it, në një kohë kur Kuba po përballet me krizën më të rëndë ekonomike në dekada.
Ky zhvillim vjen mes tensioneve të rritura, ndërsa Trump e ka quajtur Kubën “një vend në dështim” dhe ka lënë të kuptohet se mund të ndërmarrë veprime ndaj saj, ndërsa Havana ka paralajmëruar se është e gatshme të përballet me çdo kërcënim, shkruan Rt.
