Një startup spanjoll po shet dhoma gjumi në apartamente që ndahen me të huaj; një zhvillues britanik ofron kredi hipotekare për miqtë që duan të blejnë bashkë; ndërsa investimi në pjesë pronësie të shtëpive me qira po ndihmon disa qiramarrës të mbulojnë kostot e tyre të strehimit.
Këto marrëveshje të pazakonta nxjerrin në pah përpjekjet e skajshme që disa të rinj europianë janë të gatshëm të bëjnë për të përballuar krizën e strehimit, e cila i ka goditur ata më rëndë se kushdo.
Gjatë dekadës së fundit, çmimet e shtëpive në Bashkimin Europian u rritën 10% më shpejt se të ardhurat, sipas kërkimeve të Komisionit Europian, dhe të gjithë treguesit tregojnë se të rinjtë e ndjejnë këtë presion më shumë se kushdo tjetër.
Ndërsa planet e shpallura nga ekzekutivi i BE-së në dhjetor për ta bërë strehimin më të përballueshëm ende nuk kanë marrë formë, disa biznese po ofrojnë mënyra inovative për të hyrë në tregun gjithnjë e më sfidues të pronave.
Një dhomë për 80,000 euro
Në Spanjë, ku mungesa e shtëpive në Madrid, Barcelonë dhe qytete të tjera të mëdha u përkeqësua nga rritja e qirave afatshkurtra për pushime, kompania Habitacion.com ofron dhoma individuale deri në 80,000 euro. Kjo është sa një e treta e çmimit që do kushtonte një apartament me një dhomë gjumi në zona të ngjashme.
Kompania deklaroi se vitin e kaluar shiti 200 dhoma dhe ka një listë pritjeje prej 32,000 personash.
Oferta për beqarët me buxhet të kufizuar
Themeluesi dhe kreu, Oriol Valls, thotë se firma e tij ofron një zgjidhje për presionin financiar. Të dhënat zyrtare tregojnë se pagat mesatare spanjolle u rritën me 26% në dekadën e fundit, ndërsa çmimet e pronave me 81%.
“Njerëzit nuk martohen më, ose nëse martohen, nuk bëjnë fëmijë…ose e bëjnë shumë më vonë,” tha ai. “Ata kërkojnë hapësira banimi shumë më të vogla që janë gjithashtu shumë më të përballueshme.”
Blerësit duhet të plotësojnë pyetësorë përputhshmërie (nëse kanë partnerë apo nëse i lajnë enët pas ushqimit) për t’u çiftuar me bashkëpronarët. Ata gjithashtu duhet të përdorin kredi personale në vend të hipotekave.
Skemat “Buddy Up” dhe kreditë pa depozitë
Në Londër, zhvilluesi Fairview ka një skemë “Buddy Up”, duke lidhur miqtë me ndërmjetës dhe avokatë për të blerë pronë së bashku. Ndërkohë, bankat në Britani, Francë, Gjermani dhe Itali po rikthejnë hipotekat me depozitë të ulët ose zero, të cilat u zhdukën pas krizës financiare të vitit 2008, shkruan Reuters.
Natalie dhe Martin Walker nga Anglia veriore treguan se një njoftim për dëbim, kur foshnja e tyre ishte vetëm një muajshe, i shtyu ata të merrnin një kredi pa depozitë vitin e kaluar.
“Ndjenja e stabilitetit që të jep, ky është gëzimi më i madh për mua,” tha Natalie.
Investimi si alternativë
Për ata që nuk munden të blejnë një pronë të tërë, kompania PropHero ofron pjesë pronësie në ndërtesa me qira në Spanjë dhe Irlandë për vetëm 20,000 euro. Carlos Sempere, një inxhinier 36-vjeçar në Madrid, bleu një pronë për qira në jug të Spanjës sepse shtëpitë në Madrid (rreth 1 milion euro) ishin të paarritshme për të.
“Ose më ndihmon të paguaj qiranë, ose do ta shes në të ardhmen,” tha ai.
Në fund të fundit, janë kushtet e vështira të tregut ato që i detyrojnë blerësit e parë të shohin përtej kompleksiteteve ligjore. Siç shprehet konsulenti Patricio Palomar: “Të gjitha këto zgjidhje strehimi shërbejnë për të treguar se si njerëzit po varfërohen.”
