Prokurorja e Përgjithshme e Shteteve të Bashkuara, Pam Bondi, do të paraqitet këtë të mërkurë përpara Komitetit të Drejtësisë në Dhomën e Përfaqësuesve, ku pritet të përballet me pyetje të forta mbi mënyrën se si Departamenti i Drejtësisë ka trajtuar dosjet që lidhen me financierin e ndjerë dhe të dënuarin për krime seksuale, Jeffrey Epstein, përcjell Reuters.
Dëshmia e saj vjen në një moment kur ligjvënës, përfshirë edhe disa republikanë, kanë shprehur pakënaqësi për nivelin e redaktimeve dhe materialeve të mbajtura të fshehta, pavarësisht një ligji federal që kërkon publikimin e pothuajse të gjitha dokumenteve.
Muajin e kaluar, Departamenti i Drejtësisë publikoi atë që e quajti transhën përfundimtare prej më shumë se 3 milionë faqesh dokumente, duke rikthyer vëmendjen ndaj figurave të pasura dhe me pushtet që kishin lidhje me Epstein edhe pas dënimit të tij për kërkim prostitucioni nga një e mitur.
Megjithatë, ligjvënësit kanë kritikuar faktin se redaktimet në dokumente duket se tejkalojnë përjashtimet e kufizuara të parashikuara nga ligji i miratuar pothuajse njëzëri nga Kongresi në nëntor. Departamenti ka refuzuar gjithashtu publikimin e një sasie të madhe materialesh, duke argumentuar se ato mbrohen nga privilegje ligjore.
Çështja Epstein ka ndjekur Bondin gjatë gjithë mandatit të saj si kryeprokurore nën administratën e Presidentit Donald Trump. Vendimi i Departamentit të Drejtësisë verën e kaluar për të mos publikuar fillimisht materiale shtesë shkaktoi reagime të ashpra nga disa mbështetës të Trump dhe riktheu vëmendjen te miqësia e mëparshme e presidentit me Epstein, i cili vdiq në vitin 2019 teksa priste gjyqin për akuza të trafikut seksual.
Departamenti i Drejtësisë ka mbrojtur qëndrimin e tij, duke deklaruar se ka qenë transparent në rishikimin e dokumenteve dhe se redaktimet janë bërë për të mbrojtur viktimat e Epstein, megjithëse disa emra viktimash u bënë publikë në dokumentet e publikuara.
Gjatë seancës para panelit të kontrolluar nga republikanët, Bondi pritet të mbrojë drejtimin e saj të Departamentit të Drejtësisë, i cili sipas kritikëve ka pësuar ndryshime për t’u përshtatur me agjendën e Trump.
Tradita e pavarësisë së Departamentit në hetimet penale, sipas kritikëve, është zbehur ndërsa institucioni ka ndjekur hetime ndaj kundërshtarëve politikë të Trump. Departamenti tentoi pa sukses të ndjekë penalisht ish-drejtorin e FBI-së, James Comey, dhe Prokuroren e Përgjithshme të Nju Jorkut, Letitia James, të cilët kishin udhëhequr hetime ndaj Trump. Të dyja rastet janë aktualisht në apel.
Ndërkohë, FBI konfiskoi muajin e kaluar fletëvotime të zgjedhjeve të vitit 2020 në Xhorxhia, në kuadër të hetimeve mbi pretendimet e Trump për manipulim të gjerë të votave.
Bondi pritet të përballet gjithashtu me pyetje mbi përfshirjen e Departamentit në goditjen ndaj emigracionit në Minesota, ku zyra e prokurorit federal në Mineapolis po përballet me presion të madh për shkak të mbrojtjes së dhjetëra çështjeve të emigracionit dhe ndjekjes penale të personave të akuzuar për pengim të agjentëve federalë.
Departamenti i Drejtësisë është kritikuar edhe për anashkalimin e njësisë së të drejtave civile, pasi refuzoi të hetojë vrasjen e Renee Good nga një agjent federal dhe hapi vetëm një hetim të kufizuar për vrasjen e një tjetër protestuesi, Alex Pretti.
