Detaje të reja kanë dalë në dritë për rrjetin e kontrabandës së cigareve që u godit nga strukturat e specializuara të Policisë Greke, duke zbuluar një mekanizëm kriminal që funksiononte me një strukturë të ngjashme me atë të një organizate terroriste.
Rrjeti vepronte në mënyrë të tillë që anëtarët e tij nuk njihnin njëri-tjetrin, duke minimizuar rrezikun e zbulimit të plotë të organizatës.
Sipas informacioneve të siguruara nga hetimet, çdo pjesëtar i rrjetit kishte një rol të kufizuar dhe vepronte si një hallkë e pavarur, duke zbatuar urdhra të caktuar pa pasur dijeni për të gjithë zinxhirin e aktivitetit kriminal, sipas Protothema.gr.
Autoritetet vlerësojnë se ky model funksionimi siguronte mbrojtje të lartë për drejtuesit e organizatës, pasi edhe në rast arrestimi, një anëtar nuk ishte në gjendje të identifikonte strukturën apo figurat kyçe të rrjetit.
Hetimi ka zbuluar se sasi të mëdha cigare kontrabanduese prodhoheshin në Greqi dhe më pas nxirreshin jashtë vendit, me destinacion final Mbretërinë e Bashkuar, ku çmimet e cigareve janë veçanërisht të larta. Transporti realizohej përmes Belgjikës, e cila shërbente si pikë tranziti për shmangien e kontrolleve dhe gjurmimit të drejtpërdrejtë.
Në kuadër të operacionit të gjerë policor, autoritetet identifikuan një njësi qendrore të prodhimit të cigareve kontrabanduese në Beoti, ku ishte ngritur një paravijë industriale e pajisur plotësisht për prodhim masiv.
Paralelisht, rrjeti kishte krijuar të paktën dhjetë magazina në zona të ndryshme të vendit, kryesisht në Atikë, Magnezi dhe Katerini, të përdorura për ruajtjen dhe shpërndarjen e mallit të paligjshëm.
Operacioni i Policisë Greke çoi në arrestimin e gjithsej 25 personave, 19 prej të cilëve në rajonin e Atikës dhe gjashtë në Beoti.
Mes të arrestuarve janë edhe dy persona që dyshohet se kishin rolin e drejtuesve të organizatës. Gjatë kontrolleve u sekuestruan armë, shuma të konsiderueshme parash dhe automjete, që dyshohet se përdoreshin për nevojat e rrjetit kriminal.
Autoritetet vlerësojnë se bëhet fjalë për një nga rastet më të sofistikuara të kontrabandës së cigareve të zbuluara vitet e fundit, si për nga shkalla e organizimit, ashtu edhe për nga shtrirja ndërkombëtare e aktivitetit kriminal.
