Bitcoin u rrit përsëri mbi nivelin e 65,000 dollarëve të premten, ndërsa rënia globale e aksioneve të teknologjisë, e cila kishte ndikuar mbi shumë baste të rrezikshme në tregjet e aktiveve, ka treguar shenja të ngadalësimit.
Megjithatë, kriptomonedha më e madhe në botë pritet të shënojë humbjen e saj javore më të madhe që nga fundi i vitit 2022. Pas rënies rekord të tetorit të kaluar, kur Bitcoin u zhyt nga kulmi historik, ndjesia e investitorëve ndaj kriptove mbeti e ftohtë, duke e bërë rikuperimin të vështirë.
Sipas të dhënave, Bitcoin u rrit së fundmi me 4.4% në 65,894 dollarë, duke rikuperuar humbjet pasi më parë kishte rënë me 5%, në 60,008 dollarë. Megjithatë, gjatë kësaj jave, çmimi ka humbur rreth 14%, humbja javore më e madhe që nga nëntori i vitit 2022, dhe mbetet pranë nivelit më të ulët që nga fillimi i tetorit 2024.
Chris Weston, kreu i kërkimeve në Pepperstone, vuri në dukje se shumë pozicione të mëdha të mbingarkuara po mbyllen shpejt, duke kontribuar në luhatjet e çmimit.
Ether gjithashtu u rrit me 4%, duke arritur 1,921 dollarë, por pritet të regjistrojë një rënie javore prej gati 16% dhe një humbje prej 35% që nga fillimi i vitit.
Sipas CoinGecko, tregu global i kriptove ka humbur rreth 2 trilionë dollarë që nga kulmi prej 4.379 trilionë dollarësh në tetor, me mbi 1 trilion dollarë të fshirë vetëm gjatë muajit të fundit. Ndjesia e tregut ka ndikuar gjithashtu metalet e çmuara, ku ari dhe argjendi kanë shfaqur paqëndrueshmëri për shkak të blerjeve me levë dhe spekulimeve.
Bitcoin ka tendencë të ndjekë sektorin e teknologjisë dhe priret të rritet kur investitorët janë të entuziazmuar për inteligjencën artificiale. Deutsche Bank raportoi se ETF-të e Bitcoin në SHBA kanë regjistruar dalje prej më shumë se 3 miliardë dollarësh në janar, pas daljeve prej rreth 2 miliardë dhe 7 miliardë dollarësh në dhjetor dhe nëntor.
Kathleen Brooks, drejtoreshë e kërkimeve në XTB, tha se shkurtin nuk ka filluar mirë për investitorët optimistë dhe mbetet për t’u parë nëse rikuperimi mbi 65,000 dollarë shënon fillimin e një rimëkëmbjeje më të qëndrueshme, shkruan Reuters.
