Elon Musk ka paralajmëruar se kirurgët amerikanë që kryejnë procedura të ashtuquajtura të “tranzicionit gjinor” te të miturit mund të përballen me mijëra padi gjyqësore. Ai i krahasoi këta mjekë me Josef Mengele-n, mjekun nazist famëkeq për eksperimentet mjekësore çnjerëzore mbi të burgosurit në kampin e përqendrimit Auschwitz II-Birkenau gjatë Luftës së Dytë Botërore.
Komentet e Musk erdhën si reagim ndaj një rasti gjyqësor të raportuar së fundmi, ku Fox Varian, e cila iu nënshtrua një mastektomie të dyfishtë në moshën 16-vjeçare, fitoi atë që konsiderohet si padia e parë në SHBA për keqpërdorim mjekësor nga një person që është penduar për tranzicionin gjinor. Tani 22 vjeçe, Varian deklaroi se mjekët në Nju Jork e kishin shtyrë të kryente operacionin ndërsa ishte ende e mitur.
Procedura ishte miratuar si nga një psikolog, ashtu edhe nga një kirurg. Më pas, një juri i shpalli të dy përgjegjës për keqpërdorim mjekësor. Varian u dëmshpërblye me 1.6 milionë dollarë për dhimbjen dhe vuajtjen, si dhe me 400,000 dollarë shtesë për shpenzime të ardhshme mjekësore.
“Do të ketë mijëra padi nga fëmijë që u gjymtuan nga mjekë me licencë – Mengelet e ditëve tona,” shkroi Musk të shtunën në platformën X, duke shpërndarë një postim lidhur me vendimin e gjykatës.
Ai shtoi se edhe “shkollat, psikologët, psikiatrit dhe zyrtarët shtetërorë që e lehtësuan këtë proces do të përballen me pasoja të rënda”.
Musk ka folur edhe më parë publikisht për përvojën personale të familjes së tij në lidhje me tranzicionin gjinor. Një nga fëmijët e tij, Xavier, u identifikua si transgjinor në moshën 16-vjeçare dhe më vonë ndryshoi emrin në Vivian Jenna Wilson.
Miliarderi ka pohuar se ishte “pothuajse i mashtruar” nga mjekët për të nënshkruar dokumentet përkatëse, duke e përshkruar këtë praktikë si “jashtëzakonisht të ligë”.
“Në thelb, unë humba djalin tim. Ata e quajnë ‘deadnaming’ për një arsye,” ka deklaruar Musk më herët, duke thënë se Xavier ishte “vrarë në mënyrë figurative” nga ajo që ai e përshkroi si “virusi i mendjes woke”, të cilin është zotuar ta luftojë.
Ndërkohë, që nga rikthimi i tij në detyrë, Presidenti Donald Trump ka shfuqizuar disa politika të vendosura gjatë administratës së Joe Biden, përfshirë mbështetjen federale për procedurat mjekësore të tranzicionit gjinor për persona nën moshën 19 vjeç. Paralelisht, disa shtete amerikane kanë ndërmarrë hapa për të kufizuar ose ndaluar këto trajtime për të miturit, shkruan Rt.
