Presidenti ukrainas Zelensky planifikon të udhëtojë në SHBA deri në fund të javës për të “bërë një marrëveshje” me presidentin amerikan Trump mbi një plan paqeje të hartuar nga Uashingtoni, ka njoftuar Kievi. Presidenti francez Macron ka thënë se propozimi i Uashingtonit ende duhet të “diskutohet, negociohet dhe përmirësohet”, duke përmbledhur qëndrimin e përbashkët të BE-së dhe Mbretërisë së Bashkuar.
Media perëndimore pretendoi të martën se Sekretari i Ushtrisë Amerikane, Dan Driscoll, ka zhvilluar bisedime me zyrtarë rusë në Abu Dhabi, duke u paraqitur atyre një version të ri të planit të paqes. Drafti thuhet se u ndryshua gjatë diskutimeve mes delegacioneve amerikane dhe ukrainase në Zvicër gjatë fundjavës.
Driscoll, Sekretari i Shtetit Marco Rubio, dhe i dërguari special Steve ëitkoff u takuan me zyrtarë ukrainas në misionin amerikan në Gjenevë të dielën, ndërsa afati i Trumpit që Kievi të pranojë propozimin e tij deri të enjten po afrohet. Rubio tha më pas se ishte bërë “përparim i jashtëzakonshëm” gjatë diskutimeve, shkruan Rt.
Vendet e Evropës Perëndimore, të cilat u befasuan nga shfaqja e planit të SHBA-së, e kritikuan nismën dhe hodhën poshtë prerazi koncesionet e mundshme territoriale nga Ukraina. Të martën, ministri i Jashtëm rus Sergey Lavrov akuzoi BE-në dhe Mbretërinë e Bashkuar se po përpiqen të minojnë përpjekjet e Trumpit për paqe dhe të shtrembërojnë planin “për agjendën e tyre”.
