Kryeministri britanik Keir Starmer është pyetur për çështjen e ish-princit Andrew, i cili po kërkohet nga një komision i Kongresit amerikan për të dhënë dëshmi lidhur me marrëdhënien e tij me Jeffrey Epstein. Starmer nuk komentoi drejtpërdrejt për rastin e Andrew, por tha se, si parim i përgjithshëm, kushdo që ka informacion të rëndësishëm për raste të tilla duhet t’ua japë autoriteteve që po hetojnë, përcjell Euronews.
Ish-princi Andrew, tashmë Andrew Mountbatten-Windsor, nuk ka pranuar deri tani kërkesën e Kongresit për një intervistë të transkriptuar për miqësinë e tij me Epstein. Pas komentit të Starmer, presioni ndaj tij është rritur, pasi disa kongresmenë amerikanë e akuzojnë se po “fshihet” nga pyetjet serioze dhe theksojnë se hetimet do të vijojnë me ose pa bashkëpunimin e tij.
Andrew është shkëputur nga detyrat dhe titujt mbretërorë, ndërsa emri i tij del në disa prova dhe dëshmi që lidhen me festat e Epstein në ishullin Little Saint James, ku janë raportuar abuzime të shumta seksuale. Një prej viktimave, Virginia Giuffre, e cila ndërroi jetë në prill, e kishte akuzuar Andrew për abuzim seksual, duke thënë se ishte detyruar nga Epstein dhe Ghislaine Maxwell. Në dokumente të reja të publikuara muajt e fundit, emri i Andrew figuron edhe në regjistrat e fluturimeve të Epstein në vitin 2000.
