Kompania izraelite Tower Semiconductor, e cila pothuajse u ble nga Intel për 5 miliardë dollarë dy vite më parë, duket se nuk ka asnjë pendesë që marrëveshja dështoi. Vlera e saj në treg është tashmë dyfishuar, duke arritur në 10 miliardë dollarë, përcjell YNetNews.
Kompania me bazë në Migdal HaEmek publikoi rezultate të forta për tremujorin e tretë, ngriti parashikimet për të katërtin dhe njoftoi një investim prej 300 milionë dollarësh për zgjerimin e kapaciteteve të prodhimit.
Zgjerimi do të përfshijë katër prej fabrikave të saj në mbarë botën, përfshirë edhe një në Izrael, me synimin për të rritur prodhimin e çipeve analoge të gjeneratës së ardhshme, që përdorin teknologjitë SiPho (silicon photonics) dhe SiGe (silicon–germanium) — thelbësore për aplikacionet e inteligjencës artificiale (AI). Deri tani, këto çipa prodhoheshin vetëm në fabrikën e Tower në Newport, SHBA, por me investimin e ri do të shtrihen edhe në tre fabrika të tjera.
Tower njihet për specializimin e saj në gjysmëpërçues analogë, një segment fitimprurës dhe i veçantë brenda industrisë së çipave. Intel kishte planifikuar ta blinte për të forcuar njësinë e saj të foundry services, e cila ka pasur vështirësi të zgjerohet që prej dështimit të marrëveshjes.
Marrëveshja u rrëzua pasi rregullatorët kinezë refuzuan ta miratonin, në kulmin e tensioneve tregtare SHBA–Kinë. Tower përfitoi gjithsesi një kompensim prej 350 milionë dollarësh nga Intel si tarifë ndarjeje.
Në vijim, kompania pret rekord të ardhurash tremujore prej 440 milionë dollarësh në tremujorin e katërt të 2025, të nxitura nga rritja e shitjeve të teknologjive bazë. Sipas parashikimeve, Tower pritet të arrijë 1.5 miliardë dollarë të ardhura vjetore deri në fund të vitit 2025, me një rritje mesatare vjetore prej 14%.
Në tremujorin e tretë, kompania raportoi 396 milionë dollarë të ardhura, një rritje prej 6% nga tremujori i mëparshëm, dhe fitim neto prej 54 milionë dollarësh (48 cent për aksion), duke tejkaluar pritshmëritë e tregut. Fluksi i parasë operative arriti në 139 milionë dollarë.
