Gjermania po kërkon ekstradimin e një ukrainasi të arrestuar në Poloni, i dyshuar për pjesëmarrje në sulmin ndaj gazsjellësve Nord Stream në vitin 2022, ku u përdorën shpërthime në shtresën e detit Baltik, përcjell Guardian.
I arrestuari, i identifikuar në mediat polake si Volodymyr Z dhe në Gjermani si Vladimir Z, përshkruhet si zhytës i trajnuar dhe dyshohet se ka qenë pjesë e një grupi që sabotoi gazsjellësit Nord Stream 1 dhe Nord Stream 2.
“Sipas Gjykatës Federale të Drejtësisë në Gjermani, i akuzuari ishte pjesë e një grupi që vendosi eksploziv në gazsjellësit pranë ishullit Bornholm në shtator të vitit 2022. Ai ka marrë pjesë në zhytjet e nevojshme për këtë operacion,” thuhet në njoftim.
Gjykata sqaroi se grupi kishte përdorur një jaht lundrues të marrë me qira nga një kompani gjermane, duke përdorur dokumente të falsifikuara për identifikim, dhe lundroi nga porti i Rostockut në Gjermani.
Më 26 shtator 2022, shpërthimet nënujore dëmtuan tre nga katër tubacionet që transportonin gaz natyror rus në Gjermani, duke përkeqësuar tensionet lidhur me luftën në Ukrainë dhe krizën energjetike në Evropë.
Avokati i të arrestuarit, Tymoteusz Paprocki, konfirmoi arrestimin dhe tha se do të përpiqet të argumentojë se asnjë ukrainas nuk mund të mbahet përgjegjës për sulmet, pasi gazsjellësi Nord Stream 2 ishte ndalur para se të hynte në përdorim, dhe të ardhurat nga gazrat ishin në shërbim të financimit të luftës së Moskës.
Nord Stream 2, ndërtuar për të transportuar gaz rus nën Detin Baltik, u ndalua nga Gjermania në shkurt 2022 pas njohjes së republikave të vetëshpallura në Ukrainën lindore nga Rusia.
Zëdhënësi i Kremlinit, Dmitry Peskov, u shpreh se Rusia shpreson që Gjermania të përfundojë hetimet për shpërthimet, për të cilat fajëson Kievin.
Fillimisht besohej se Rusia ishte përgjegjëse për sulmin, por hetuesit gjermanë tani dyshojnë në një grup ukrainas prej pesë burrash dhe një gruaje.
Presidenti ukrainas, Volodymyr Zelenskyy, mohoi dijeninë ose përgjegjësinë për sulmin.
Në rast se ekstradimi kryhet, i dyshuari do të paraqitet para një gjykatësi hetues në Gjykatën Federale në Karlsruhe.
Në muajin e kaluar, një tjetër ukrainas, Serhii Kuznietsov, u arrestua në Itali dhe pritet të ekstradohet në Gjermani për të njëjtat akuza.
