Një zjarr i fuqishëm ka përfshirë zonën e Kerateas në Greqi që nga mesdita e së premtes, duke lënë pas dëme të mëdha dhe një viktimë. Një burrë i moshuar humbi jetën pasi nuk arriti të largohej në kohë nga një ndërtesë me tulla në zonën e Doganit, ku u gjet i pajetë nga autoritetet.
Flakët janë përhapur në një rreze prej 7 kilometrash dhe për shkak të erërave të forta, situata mbetet jashtë kontrollit. Sipas autoriteteve greke, deri më tani janë evakuuar të paktën 124 banorë nga zona të ndryshme përreth, përfshirë Maliasteka, Agiasma, Harvalo, Drosia, Dimolaki, Synerina, Palaia Fokaia, ATE, Charakas, Legrena, Triantafyllia, Feriza, Olympos dhe Thymari.
Forcat zjarrfikëse janë në terren me 260 efektivë, 77 automjete dhe 10 ekipe alpinistësh nga EMODE. Nga ajri po operojnë 13 avionë dhe 15 helikopterë, të cilët pritet të vazhdojnë ndërhyrjen deri në perëndim të diellit.
Ndërkohë, është evakuuar edhe një shtëpi të moshuarish në Anavyssos, ku janë larguar në mënyrë të sigurt 35 persona./Protothema
