Rusia ka lëshuar një numër rekord prej 728 dronësh Shahed dhe karremesh, si dhe 13 raketa gjatë natës drejt Ukrainës, njoftoi Forca Ajrore ukrainase të mërkurën, në atë që përfaqëson një përshkallëzim të ri të ofensivës ajrore dhe tokësore në luftën tashmë mbi trevjeçare.
Sipas Presidentit Volodymyr Zelenskyy, qyteti i Lutskut, në veriperëndim të vendit, pranë kufirit me Poloninë dhe Bjellorusinë, ishte më i godituri. Goditje u raportuan gjithashtu në 10 rajone të tjera të Ukrainës.
Lutsku është një pikë kyçe ushtarake, me aeroporte të përdorura nga forcat ajrore ukrainase. Fluturime të avionëve mallrash dhe avionëve luftarakë janë të zakonshme mbi qytet. Ende nuk është raportuar për viktima, ndërsa ekipet e emergjencës vijojnë vlerësimin e dëmeve.
Rajonet perëndimore të Ukrainës, përfshirë Lutskun, përbëjnë shtyllën logjistike të luftës, pasi aty grumbullohen ndihmat ushtarake ndërkombëtare përpara se të shpërndahen në pjesë të tjera të vendit. Rusia ka intensifikuar goditjet me rreze të gjatë, me qëllim prishjen e këtyre korridoreve të furnizimit jetik./AP
