Ministri i Jashtëm i Iranit, Abbas Araqchi, deklaroi se Ngushtica e Hormuzit është tashmë e hapur pas arritjes së marrëveshjes së armëpushimit në Liban.
Ndërkohë, Presidenti i SHBA-së, Donald Trump, u shpreh se beson që një marrëveshje për t’i dhënë fund luftës me Iranin do të arrihet “së shpejti”, ndonëse kohëzgjatja e saktë mbetet ende e paqartë.
Përmes një postimi në rrjetin social X, Araqchi konfirmoi se Ngushtica është e hapur për të gjitha anijet tregtare gjatë kohëzgjatjes së armëpushimit 10-ditor mes forcave izraelite dhe Hezbollahut, i cili u ndërmjetësua nga SHBA, përcjell Reuters.
“Araqchi tha në një postim në X se Ngushtica ishte e hapur për të gjitha anijet tregtare për pjesën e mbetur të armëpushimit 10-ditor të ndërmjetësuar nga SHBA”, raporton Reuters.
Ministri iranian specifikoi gjithashtu se kalimi i anijeve do të duhet të bëhet përgjatë itinerarit të shpallur nga Organizata e Porteve dhe Detarisë së Iranit.
Pas këtij njoftimi, çmimet e naftës pësuan një rënie të menjëhershme prej rreth 9%, duke reflektuar lehtësimin e tregjeve pas kërcënimit për një goditje të rëndë globale.
Konflikti që nisi më 28 shkurt kishte destabilizuar Lindjen e Mesme dhe kishte mbyllur efektivisht Ngushticën e Hormuzit, përmes së cilës kalon një e pesta e naftës dhe gazit të lëngshëm në botë.
Fondi Monetar Ndërkombëtar kishte paralajmëruar këtë javë se ekonomia globale rrezikonte recesionin nëse ky konflikt do të zgjatej më tej.
Nga ana e tij, Presidenti Trump deklaroi se bisedimet mund të nisin që këtë fundjavë, megjithëse kjo duket gjithnjë e më pak e mundshme për shkak të logjistikës së mbledhjes së zyrtarëve në Islamabad të Pakistanit, ku pritet të mbahen negociatat.
Trump kishte thënë të enjten se bisedimet mund të ndodhin që këtë fundjavë, megjithëse kjo dukej gjithnjë e më pak e mundshme deri të premten pasdite duke pasur parasysh logjistikën.
