Zëvendëspresidenti i SHBA-së JD Vance ka mbërritur në Islamabad për bisedime të nivelit të lartë me Iranin, me synim ruajtjen e armëpushimit të brishtë dhe shmangien e një përshkallëzimi të ri të konfliktit në rajon, përcjell Fox News.
Delegacioni amerikan përfshin gjithashtu të dërguarin special Steve Witkoff dhe Jared Kushner. Nga pala iraniane në negociata marrin pjesë ministri i Jashtëm Abbas Araghchi dhe kryetari i Parlamentit Mohammad Bagher Ghalibaf.
Bisedimet zhvillohen më shumë se një muaj pas nisjes së operacionit ushtarak Operation Epic Fury, i cili e çoi situatën në prag të një lufte të hapur mes SHBA-së dhe Iranit.
Pak ditë më parë, presidenti Donald Trump shpalli një armëpushim dyjavor, i cili parashikon ndër të tjera rihapjen e Ngushticës së Hormuzit, një arterie kyçe për tregtinë globale të naftës. Megjithatë, trafiku detar mbetet i kufizuar për shkak të pasigurive mbi zbatimin e marrëveshjes.
Para nisjes, Vance paralajmëroi Teheranin të mos testojë qëndrimin e SHBA-së në negociata, duke e cilësuar armëpushimin si “të brishtë”, por duke shprehur shpresë për rezultate pozitive.
Nga ana tjetër, autoritetet iraniane kanë theksuar se pranimi i armëpushimit nuk nënkupton përfundimin e luftës, duke paralajmëruar reagim në rast shkeljesh.
Pakistani është shfaqur si ndërmjetës kyç në këto bisedime, por roli i tij është vënë në pikëpyetje pas deklaratave të diskutueshme të ministrit të Mbrojtjes Khawaja Asif, që kanë nxitur reagime nga Izraeli.
Bisedimet në Islamabad konsiderohen një mundësi e rrallë për diplomaci, ndërsa rezultati i tyre mund të përcaktojë nëse armëpushimi do të mbahet apo rajoni do të rikthehet në konflikt të hapur.
