Komisioni Evropian i ka kërkuar Hungarisë të japë sqarime lidhur me raportimet që cilësohen si “shqetësuese”, sipas të cilave ministri i Jashtëm hungarez, Péter Szijjártó, ka ndarë në mënyrë të vazhdueshme informacione konfidenciale nga takimet e Bashkimit Evropian me homologun e tij rus, Sergei Lavrov.
Sipas raportimeve, Szijjártó ka qenë në kontakt të rregullt me Lavrovin gjatë mbledhjeve të BE-së në Bruksel, duke komunikuar me të edhe gjatë pushimeve të takimeve, çka ka shkaktuar reagime të forta, pasi diskutimet në këto forume konsiderohen konfidenciale dhe mbështeten mbi parimin e besimit mes shteteve anëtare.
Qeveria hungareze i ka mohuar këto pretendime, duke i cilësuar ato si lajme të rreme.
Një zëdhënës i Komisionit Evropian u shpreh se raportimet janë serioze dhe kërkojnë sqarime të menjëhershme.
“Raportimet për ndarjen e diskutimeve me dyer të mbyllura janë thellësisht shqetësuese. Marrëdhënia e besimit mes shteteve anëtare dhe institucioneve është themelore për funksionimin e BE-së,” tha ai, duke shtuar se pritet një përgjigje nga Budapesti, shkruan Euronews.
Çështja vjen në një moment tensionesh politike në Hungary, përpara zgjedhjeve parlamentare, ku kryeministri Viktor Orbán përballet me një sfidë të fortë nga opozita e udhëhequr nga Péter Magyar.
Qeveria e Orbán konsiderohet ndër të paktat në Evropë që ruan marrëdhënie të afërta me Kremlinin, ndërsa Hungaria vijon të importojë sasi të mëdha energjie nga Rusia, pavarësisht thirrjeve të BE-së për të ulur varësinë.
Ndërkohë, kryeministri i Polonisë, Donald Tusk, reagoi ashpër ndaj raportimeve.
“Lajmi që njerëzit e Orbán informojnë Moskën për takimet e BE-së nuk duhet të habisë askënd. Kemi pasur dyshime prej kohësh,” u shpreh ai.
Institucionet evropiane kanë bërë të ditur se po vlerësojnë nëse ka pasur shkelje të rregullave, ndërsa burime nga Këshilli i BE-së theksojnë se rasti reflekton një krizë më të gjerë besimi dhe nevojën për bashkëpunim të sinqertë me Budapestin.
Zhvillimet vijnë vetëm pak ditë pasi Orbán mbajti veton ndaj një pakete prej 90 miliardë eurosh për Ukrainën, duke rritur më tej përplasjet me shumicën e vendeve anëtare të Bashkimit Evropian.
