Kristi Noem, ish-guvernatore e Dakotës së Jugut dhe ish-kongresmene, është shkarkuar nga detyra si drejtuese e Departamentit të Sigurisë Kombëtare gjatë mandatit të dytë të presidentit Donald Trump.
Lajmin për largimin e saj nga posti e bëri publik vetë Trump përmes platformës Truth Social, ku njoftoi gjithashtu se synon të propozojë si pasues senatorin republikan Markwayne Mullin. Deri në konfirmimin e emërimit të ri, detyrën pritet ta mbajë përkohësisht zëvendëssekretari Troy Edgar, një ish-oficer i Marinës amerikane dhe ish-kryetar bashkie në Los Alamitos të Kalifornisë.
Gjatë periudhës në krye të Departamentit të Sigurisë Kombëtare, Noem u përqendrua në zbatimin e politikave shumë më të ashpra në fushën e emigracionit, duke ndryshuar qasjen e administratës së mëparshme të drejtuar nga Alejandro Mayorkas gjatë presidencës së Joe Biden.
Sipas të dhënave të publikuara nga administrata, gjatë vitit të parë të mandatit të saj janë sekuestruar më shumë se 500 mijë paund drogë ilegale, ndërsa gjatë vitit 2025 u regjistruan rreth dy milionë raste të vetë-dëbimit dhe afërsisht 670 mijë emigrantë të paligjshëm u larguan nga Shtetet e Bashkuara.
Përkrahësit e saj e kanë përshkruar këtë operacion si një nga fushatat më të mëdha të zbatimit të ligjit për emigracionin në historinë e vendit.
Megjithatë, veprimet dhe politikat e saj kanë shkaktuar kritika të forta nga figura të Partisë Demokratike, përfshirë guvernatorin e Kalifornisë Gavin Newsom, kongresmenin Eric Swalwell, guvernatorin e Minesotës Tim Walz dhe kandidatin për Kongres David Trone.
Kritikat janë përqendruar veçanërisht në operacionet e dëbimit masiv dhe në funksionimin e një qendre ndalimi për emigrantët në Williamsport.
Gjatë një seance dëgjimore në Kongres, Noem u përball gjithashtu me pyetje të ashpra lidhur me një kontratë reklame të financuar nga taksapaguesit dhe me pretendimet për një marrëdhënie të supozuar me ish-strategun e fushatës së Trump, Corey Lewandowski.
Pyetjet u ngritën nga kongresmenët demokratë Sydney Kamlager-Dove dhe Jared Moskowitz, ndërsa Noem i hodhi poshtë akuzat duke i cilësuar si shpifje të tabloidëve.
Pavarësisht polemikave, shumë republikanë e kanë mbështetur punën e saj. Kongresmeni Clay Higgins deklaroi se ajo mori në dorëzim një situatë shumë të rënduar në kufi dhe arriti ta përmbysë atë, duke theksuar se gjatë mandatit të saj është shënuar një rënie prej rreth 97 për qind e kalimeve të paligjshme në kufirin jugor të Shteteve të Bashkuara, shkruan Fox News.
