Të paktën nëntë protestues u qëlluan për vdekje kur turma njerëzish depërtuan murin e jashtëm të konsullatës së SHBA-së në qytetin pakistanez të Karaçit, pas lajmeve për sulmet e SHBA-së dhe Izraelit mbi Iran që vranë Udhëheqësin Suprem, Ajatollahun Ali Khamenei.
Protestuesit bërtisnin thirrje “Vdekje Izraelit, vdekje Amerikës”, ndërsa në Irak, policia përdori gaz lotsjellës dhe granata trullosëse për të shpërndarë qindra protestues pro-iranianë të mbledhur jashtë Zonës së Gjelbër në Bagdad, ku ndodhet ambasada amerikane. Pakistani dhe Iraku kanë popullsitë më të mëdha të myslimanëve shiitë pas Iranit.
Në Karaçi, protestuesit u zmbrapsën nga konsullata pasi kishin thyer shtresën e parë të sigurisë, sipas zëdhënësit të qeverisë lokale, Sukhdev Assardas Hemnani, i cili shtoi se ata dogjën një automjet jashtë portës kryesore dhe u përleshën me policinë.
Hemnani deklaroi se zyrtarët e sigurisë së konsullatës amerikane hapën zjarr ndaj protestuesve, por konfirmoi se stafi i konsullatës është i sigurt. Policia raportoi për të paktën nëntë të vrarë dhe 34 të plagosur, të cilët sipas Spitalit Civil të Karaçit ishin goditur të gjithë me armë zjarri.
Konsullata amerikane në Karaçi dhe Ambasada në Islamabad nuk iu përgjigjën kërkesave për koment, ndërsa gazetarët e Reuters raportuan për krisma armësh dhe gaz lotsjellës në rrugët përreth kompleksit.
Përmes një postimi në platformën X, Ambasada e SHBA-së në Islamabad njoftoi se po monitoronte raportet për demonstratat dhe këshilloi qytetarët amerikanë në Pakistan të tregonin kujdes të shtuar për sigurinë e tyre personale.
Ministri i Brendshëm i Pakistanit, Mohsin Naqvi, u bëri thirrje protestuesve të qëndronin paqësorë, duke u shprehur se çdo pakistanez ishte po aq i pikëlluar sa populli i Iranit, ndërkohë që qeveria provinciale urdhëroi një hetim të nivelit të lartë për të përcaktuar shkaqet e përshkallëzimit të situatës dhe për të identifikuar përgjegjësit.
Trazirat u shtrinë edhe në pjesë të tjera të Pakistanit, ku turma të mëdha njerëzish mbanin flamuj të zinj dhe thirrnin parulla kundër Amerikës dhe Izraelit. Në qytetin verior të Skardu, në rajonin Gilgit Baltistan me shumicë shiite që zakonisht është i qetë dhe i frekuentuar nga turistët, protestuesit i vunë zjarrin një ndërtese të zyrave të Kombeve të Bashkuara. Zëdhënësi i qeverisë lokale, Shabbir Mir, konfirmoi se ndërtesa u dogj plotësisht, por fatmirësisht nuk u raportuan viktima nga ky incident.
Në qytetin qendror të Lahores, qindra protestues u mblodhën jashtë konsullatës amerikane dhe u përleshën në shkallë të vogël me policinë, e cila përdori gaz lotsjellës për t’i shpërndarë pasi disa prej tyre u përpoqën të dëmtonin portën e sigurisë. Ndërkohë në kryeqytet, në Islamabad, të gjitha rrugët që të çojnë drejt Zonës së Kuqe, ku ndodhen misionet diplomatike dhe parlamenti, u bllokuan për trafikun.
Policia hodhi gaz lotsjellës kur qindra protestues tentuan të marshonin drejt enklavës diplomatike. Burimet diplomatike bëjnë me dije se misionet perëndimore në Pakistan kanë shtuar protokollet e sigurisë dhe kanë kufizuar lëvizjet e stafit në të gjithë vendin për shkak të rritjes së tensioneve, shkruan Reuters.
