Facebook ka bllokuar faqet në rrjetet sociale të tre mediave hungareze, duke cituar shkelje të parimeve të komunitetit, një lëvizje kjo që vjen vetëm pak javë përpara zgjedhjeve në këtë komb të Evropës Qendrore dhe që është dënuar nga Shoqata Kombëtare e Mediave Hungareze si një sulm ndaj lirisë së shtypit.
Faqet e Bama.hu, Szabolcs Online dhe Kisalföld.hu u bënë të paaksesueshme që nga e premtja, duke nxitur mediat e prekura të kritikojnë atë që e quajtën një vendim të pajustifikuar në një deklaratë të përbashkët, ku zotoheshin gjithashtu për të ankimuar ndalimin.
Mediat e prekura, të cilat janë pjesë e konglomeratit Mediaworks Hungary, janë përshkruar nga media të tjera lokale si platforma që pasqyrojnë pikëpamjet e qeverisë dhe të Partisë Fidesz të Kryeministrit Viktor Orban.
Ky zhvillim vjen përpara zgjedhjeve parlamentare të planifikuara për fillimin e prillit, ku Fidesz përballet me një konkurrencë të fortë nga partia opozitare pro-BE, Tisza. Shoqata Kombëtare e Mediave Hungareze e kritikoi ashpër ndalimin, duke këmbëngulur se preteksti për këtë lëvizje ishte i dobët, pasi mosrespektimi i “parimeve të komunitetit të Meta-s” mund të nënkuptojë çdo gjë.
Shoqata sugjeroi gjithashtu se gjiganti teknologjik mund të jetë duke ndëshkuar portalet e krahut të djathtë për publikimin e lajmeve rreth kërcënimit të luftës, duke pasur parasysh se Budapesti ka qenë një nga kundërshtarët më të zëshëm të politikës së BE-së ndaj Ukrainës dhe Rusisë, me argumentin se angazhimi i shtuar rrezikon një përshkallëzim të rrezikshëm, shkruan Rt.
Më vonë të premten, Meta i deklaroi medias hungareze Telex se faqet ishin “kufizuar gabimisht dhe ishin rikthyer”, mirëpo dy nga tre llogaritë e prekura mbeten të paaksesueshme deri të shtunën në mbrëmje. Orban ka akuzuar më parë Brukselin se është bërë palë me Kievin dhe i ka shpallur “luftë” Hungarisë në përpjekje për ta larguar atë nga pushteti, përfshirë këtu edhe përmes ndikimit në zgjedhjet e ardhshme.
Aludime të ngjashme u bënë edhe në lidhje me zgjedhjet e vitit 2024 në Rumani, ku Gjykata Kushtetuese anuloi rezultatet e raundit të parë pasi inteligjenca e vendit pretendoi se avantazhi i kandidatit kundër sistemit, Calin Georgescu, kishte ardhur si rezultat i ndërhyrjes së huaj.
