I dërguari i posaçëm Steve Witkoff paralajmëroi të shtunën se Irani mund të jetë “një javë larg” zotërimit të “materialit të shkallës industriale për bërjen e bombës atomike”, duke ngritur pyetje urgjente se çfarë mund të bëjë më tej presidenti Donald Trump për të adresuar këtë kërcënim.
“Është deri në 60%,” tha Witkoff lidhur me nivelin e pasurimit të Iranit.
“Ata janë ndoshta një javë larg zotërimit të materialit të shkallës industriale për bërjen e bombës.”
Kjo rrethanë “e rrezikshme”, tha Witkoff në emisionin “My View me Lara Trump”, vjen pavarësisht vijës së kuqe të Trump për “pasurim zero” nga ana e Iranit.
“Ne nuk mund ta lejojmë këtë,” tha ai.
“Kjo është diçka që ata duhet ta respektojnë derisa të na provojnë se mund të sillen mirë.”
Witkoff i tha Fox News se presidenti është “kureshtar” pse Irani nuk ka ndryshuar kurs pavarësisht rritjes së presionit të SHBA-së në rajon.
“Me gjithë atë sasi të forcës detare që kemi atje, pse nuk kanë ardhur tek ne për të thënë: ‘Ne deklarojmë se nuk duam armë?'”
Por presionet e jashtme janë vetëm një pjesë e tablosë. Regjimi islamik përballet me presione shtesë nga civilët e vet, gjë që ka nxitur trazira dhe agresion shtetëror kundër protestuesve, shkruan Fox.
Princi i kurorës në mërgim, Reza Pahlavi, i cili ka diskutuar propozimin për ndryshim regjimi në Iran në raste të shumta, ka shprehur më parë besim në aftësinë dhe vullnetin e Trump për të ndihmuar në rrëzimin e regjimit.
Pahlavi ka paraqitur një sërë masash që SHBA mund të ndërmerrte për të dobësuar Ajatollahun, duke përfshirë neutralizimin e Gardës Revolucionare Islamike (IRGC), goditjen e “anijeve fantazmë” që transportojnë fshehurazi naftë nën sanksione për të financuar regjimin, dëbimin e diplomatëve ose mbajtjen e tyre përgjegjës për sjellje kriminale, ngrirjen e aseteve të oligarkëve, mbështetjen e protestuesve me qasje në internet dhe thirrjen për lirimin e pakushtëzuar të të gjithë të burgosurve politikë në Iran.
Witkoff i tha Lara Trump se ai u takua me Pahlavin me udhëzimin e presidentit.
“Mendoj se ai kujdeset për vendin e tij, por kjo do të ketë të bëjë me politikat e Presidentit Trump, jo me politikat e z. Pahlavi,” tha ai.
