Shkencëtarët kanë identifikuar një specie të re Spinosaurusi në shkretëtirën e Saharasë në Niger. Fosilet tregojnë një predator peshkngrënës me një kreshtë dramatike në formë hanxhari (shpatë e lakuar), i cili ka jetuar rreth 95 milionë vite më parë.
Zbulimi u detajua në revistën Science të enjten dhe u vlerësua nga University of Chicago News. Grupi prej 20 personash që bëri zbulimin u udhëhoq nga Paul Sereno, profesor i biologjisë organizmale dhe anatomisë në universitet. Ai e emërtoi dinosaurin e ri “Spinosaurus mirabilis”.
“Ky gjetje ishte aq e papritur dhe mahnitëse, sa ishte vërtet emocionale për ekipin tonë,” deklaroi Sereno.
Profesori udhëhoqi ekspeditat në Niger në vitet 2019 dhe 2022, kohë kur u mblodh materiali për raportin.
Studimi specifikon se “specia e re bazohet në zgjatimin dramatik dhe formën e hanxharit të kreshtës kraniale (të kokës) dhe veçori të tjera delikate që e dallojnë atë nga i afërmi i tij më i ngushtë, Spinosaurus aegyptiacus.”
Sereno tha se kafsha ngjante me një çafkë gjigante të përshtatur për të gjuajtur në lumenj, gjë që frymëzoi pseudonimin “çafka e ferrit” (hell heron). Studiuesit e krahasuan kreshtën e dinosaurit me veçori të ngjashme të kokës te zogjtë modernë. Studimi thotë se kreshta ishte e mbuluar nga një shtresë e jashtme e fortë e përbërë nga keratinë, i njëjti material që gjendet te thonjtë e njeriut.
Skanimet treguan gjithashtu kanale të vogla brenda kockës që dikur transportonin gjak. Për të kuptuar më mirë se si mund të ishte dukur dhe si funksiononte kreshta, ekipi studioi zogj të tillë si Casuarius casuarius, i cili ka një strukturë të madhe kockore në kokën e tij.
Një nga kërkuesit adresoi gjithashtu një imazh të hershëm që qarkulloi në internet përpara se punimi të publikohej. Shkencëtari tha se imazhi tregonte një model fillestar të përafërt, të krijuar gjatë punës në terren në vitin 2022, për të ndihmuar ekipin të vizualizonte dinosaurin e ri.
Afrika ka sjellë disa zbulime të rëndësishme dinosaurësh gjatë dekadave të fundit. Në vitin 1999, një ekip tjetër i udhëhequr nga Paul Sereno përshkroi Jobaria tiguidensis, një dinosaur i madh barngrënës me qafë të gjatë, i zbuluar në Niger. Fosilet u gjetën në shkretëtirën e Saharasë dhe datonin në periudhën e Jurasikut të Mesëm.
Një tjetër zbulim u njoftua në vitin 2018 në Egjipt. Shkencëtarët përshkruan një specie të re titanosauri, Mansourasaurus shahinae, bazuar në fosilet e zbuluara në Shkretëtirën Perëndimore, shkruan Rt.
