Në Kuba, jeta e përditshme duket se është ndalur, teksa mungesa e karburantit ka çuar në një krizë të thellë humanitare dhe sociale. Situata u përkeqësua pasi Shtetet e Bashkuara forcuan masat për të ndaluar dërgesat e naftës drejt ishullit, duke çuar në ndërprerje të punës së shërbimeve bazë si mbledhja e mbeturinave, përcjell DW.
Para syve të banorëve, mbeturinat kanë filluar të grumbullohen në qoshet e rrugëve të kryeqytetit, Havanës, duke shkaktuar lagështi, erë të keqe dhe fluks insektesh përreth grumbullimeve, pasi kamionët për mbledhjen e mbeturinave nuk kanë karburant për të operuar. Vetëm 44 nga 106 kamionë janë në gjendje të funksionojnë për shkak të mungesës së karburantit.
Banorët raportojnë se ka kaluar më shumë se 10 ditë që nga mbledhja e fundit e mbeturinave, ndërsa disa prej tyre kërkojnë në mbeturina objekte të ripërdorshme për shkak të vështirësive në jetesë.
Kuba, e cila ka rreth 11 milionë banorë, përballet me një mungesë të theksuar të karburantit prej fillimit të janarit, pasi vendet që më parë furnizonin ishullin me naftë—si Venezuela dhe më pas Meksika—ndaluan dërgesat nën presionin e SHBA-së dhe kërcënimeve për tarifa tregtare.
Në përpjekje për të mbrojtur shërbimet themelore, qeveria kubane ka vendosur masa të reja, duke përfshirë sisteme rezervimi për karburant dhe racionim, por qytetarët ende presin për muaj të tërë për furnizim.
Kjo krizë ka ndikuar edhe në sektorë të tjerë si transporti publik, i cili është ndalur pothuajse plotësisht për shkak të mungesës së karburantit.
Organizatat ndërkombëtare si Komisioneri i Lartë i OKB për të Drejtat e Njeriut kanë shprehur shqetësim për ndikimin humanitar të kësaj situate, duke paralajmëruar për rrezikun e një përkeqësimi dramatik të furnizimit me ushqim, ujë, shërbime mjekësore dhe energji elektrike në vend.
