Shefi i stafit i kryeministrit britanik Keir Starmer, Morgan McSweeney, ka dhënë dorëheqjen nga qeveria këtë të diel, pas zbulimeve të reja që lidhen me Peter Mandelson në dosjet e Jeffrey Epstein.
Dokumente të publikuara nga administrata amerikane tregojnë se Mandelson, ish-ambasadori i emëruar nga Starmer në Uashington, ka mbajtur kontakte me kriminelin e dënuar seksual për një periudhë më të gjatë sesa kishte pranuar fillimisht. Po ashtu, policia po heton korrespondencë elektronike që sugjeron se Mandelson i ka përcjellë Epstein-it informacione mbi diskutime të brendshme financiare pas krizës bankare të vitit 2008.
Dorëheqja e McSweeney-t nënkupton humbjen e një prej bashkëpunëtorëve më besnikë dhe me ndikim të Starmer-it, në një moment kur kryeministri po përballet tashmë me presion të konsiderueshëm nga deputetët dhe nga radhët e Partisë Laburiste, ku disa figura, privatisht, po bëjnë thirrje për largimin e tij nga detyra.
Në një deklaratë të publikuar të dielën pasdite, McSweeney pranoi se emërimi i Mandelson kishte qenë “një gabim” dhe se ai “dëmtoi partinë tonë, vendin tonë dhe besimin e publikut te politika”.
Ai theksoi se mbante “përgjegjësi të plotë”, pasi kishte qenë ai që e kishte këshilluar personalisht Starmer-in për këtë emërim. “Në jetën publike, përgjegjësia duhet të merret kur ka më shumë rëndësi, jo vetëm kur është më e përshtatshme. Në këto rrethana, e vetmja rrugë e ndershme është të tërhiqem,” u shpreh ai.
McSweeney ka qenë një figurë kyçe në ekipin e Starmer-it gjatë gjithë periudhës së tij si lider i Partisë Laburiste. Roli i tij prapaskenave në fund të viteve 2010, fillimisht në think tank-un Labour Together dhe më pas drejtpërdrejt për Starmer-in, ishte vendimtar në dobësimin e krahut të majtë të partisë dhe në hapjen e rrugës për ngjitjen e Starmer-it në krye të Laburistëve dhe, më pas, në Downing Street.
Megjithatë, McSweeney kishte qenë prej kohësh nën presion për të dhënë dorëheqjen, presion që u përshkallëzua pasi Departamenti i Drejtësisë i SHBA-së publikoi email-e të tjerë që zbardhnin më qartë shkallën e marrëdhënies mes Mandelson dhe Epstein.
Mandelson ishte emëruar në këtë post në dhjetor 2024, por u shkarkua në shtator të vitit të kaluar, pasi dolën në dritë detaje të reja mbi lidhjet e tij me Epstein. Pas publikimit të email-eve shtesë në fillim të këtij muaji, Mandelson dha dorëheqjen edhe nga anëtarësimi në Partinë Laburiste, si dhe nga vendi i tij në Dhomën e Lordëve, shkruan Politico.
Si Starmer ashtu edhe McSweeney kanë qenë nën presion të fortë për mbështetjen e këtij emërimi, me deputetë laburistë dhe ish-ministra të kabinetit që u kanë bërë thirrje të dyve të rishikojnë të ardhmen e tyre politike.
