Të paktën 15 minatorë humbën jetën dhe shtatë të tjerë u plagosën pasi një dron rus goditi një autobus që transportonte punonjës të sektorit minerar në rajonin juglindor të Dnipropetrovskut, njoftuan të dielën kompania energjetike DTEK dhe autoritetet ukrainase.
Sulmi ndodhi vetëm disa orë pasi Presidenti Volodymyr Zelensky bëri të ditur se raundi i dytë i bisedimeve trilaterale, të ndërmjetësuara nga Shtetet e Bashkuara mes Ukrainës dhe Rusisë, pritet të zhvillohet javën e ardhshme.
Në një deklaratë zyrtare, DTEK tha se forcat ruse kryen një “sulm masiv terrorist” ndaj një prej minierave të saj në rajon, duke sqaruar se viktimat ishin punonjës të kompanisë që po ktheheshin nga turni i punës.
“Sot armiku ndërmori një sulm cinik dhe të qëllimshëm kundër punonjësve të sektorit energjetik në rajonin e Dnipropetrovskut,” shkroi ministri i Energjisë, Denys Shmyhal, në platformën Telegram.
Sulme edhe ndaj objektivave civile
Policia konfirmoi se ngjarja ndodhi në qytetin Terenivka. Pamjet e publikuara nga Shërbimi Shtetëror i Emergjencave treguan autobusin e shkatërruar dhe të dalë nga rruga, me xhama të thyer dhe dëmtime të rënda nga shpërthimi.
Më herët gjatë së dielës, autoritetet rajonale raportuan se të paktën nëntë persona u plagosën nga sulme të tjera ruse që goditën një maternitet dhe një ndërtesë banimi në qytetin juglindor të Zaporizhias.
Këto sulme erdhën në një moment tensionesh të shtuara, pasi Zelensky deklaroi se Rusia — ndonëse kishte rënë dakord të pezullonte sulmet ndaj infrastrukturës energjetike ukrainase deri më 1 shkurt — po vazhdon të shënjestrojë objektiva logjistike në territorin e Ukrainës, shkruan Reuters.
