Ministrat e jashtëm të Bashkimit Evropian miratuan të enjten sanksione të reja ndaj Iranit, të cilat synojnë individë dhe subjekte të përfshira në një shtypje të dhunshme ndaj protestuesve dhe në mbështetjen e vendit për Rusinë, thanë të enjten diplomatët e BE-së.
Ministrat pritet gjithashtu të arrijnë një marrëveshje politike për të përfshirë Trupat e Gardës Revolucionare Islamike të Iranit në listën e organizatave terroriste të bllokut, duke e vendosur IRGC-në në një kategori të ngjashme me atë të Shtetit Islamik dhe al-Kaedës dhe duke shënuar një ndryshim simbolik në qasjen e Evropës ndaj udhëheqjes së Iranit, shkruan Reuters.
Disa anëtarë të BE-së, të udhëhequr nga Franca, kanë qenë prej kohësh të ngurruar ta shtojnë IRGC-në në atë listë, por Parisi tha të mërkurën se do ta mbështeste këtë veprim, duke i hapur rrugën një miratimi , edhe pse një vendim i tillë kërkon unanimitet midis 27 anëtarëve të bllokut.
IRGC-ja, e krijuar pas Revolucionit Islamik të Iranit në vitin 1979 për të mbrojtur sistemin qeverisës klerikal shiit, ka ndikim të madh në vend, duke kontrolluar pjesë të mëdha të ekonomisë dhe forcave të armatosura, dhe gjithashtu u vu në krye të programeve të raketave balistike dhe atyre bërthamore të Iranit.
