Policia federale gjermane kreu të mërkurën kontrolle në zyrat e Deutsche Bank në Frankfurt dhe Berlin, në kuadër të një hetimi për dyshime për pastrim parash, njoftuan prokurorët e Frankfurtit.
Banka më e madhe e Gjermanisë është përballur gjatë dekadës së fundit me disa raste të dështimit të mekanizmave të saj kundër pastrimit të parave, gjë që ka çuar në mbikëqyrje më të rreptë nga autoritetet rregullatore, gjoba të konsiderueshme dhe bastisje policore.
Prokurorët bënë të ditur se hetimi ka në fokus persona ende të paidentifikuar, si dhe punonjës të bankës. Burime të njohura me çështjen i thanë Reuters se rasti lidhet me transaksione të kryera në periudhën 2013–2018. Sipas prokurorisë, Deutsche Bank ka pasur marrëdhënie biznesi me kompani të huaja që dyshohet se janë përdorur si mjete për pastrim parash.
Deutsche Bank konfirmoi kontrollet dhe deklaroi se po bashkëpunon plotësisht me zyrën e prokurorit publik, por nuk dha detaje të mëtejshme mbi hetimin. Aksioni i së mërkurës u duk më pak i dukshëm krahasuar me bastisjet e mëparshme, pasi nuk pati prani të theksuar të automjeteve policore pranë selisë qendrore në Frankfurt.
Megjithatë, lajmi pati ndikim të menjëhershëm në tregjet financiare, ku aksionet e Deutsche Bank ranë me rreth 3% gjatë pasdites. Kontrollet u zhvilluan vetëm një ditë përpara publikimit të rezultateve financiare për vitin 2025, të cilat analistët presin të jenë fitimet më të larta neto të bankës që nga viti 2007.
Ky nuk është rasti i parë që Deutsche Bank përballet me hetime të tilla. Në vitin 2017, banka pranoi të paguante 630 milionë dollarë gjoba rregullatorëve në SHBA dhe Britani për transaksione që ndihmuan në nxjerrjen e rreth 10 miliardë dollarëve jashtë Rusisë.
Po ashtu, në vitin 2018, zyrat e saj u kontrolluan për lidhje me skandalin “Panama Papers”, ndërsa në vitin 2022 u përball sërish me kontrolle për vonesa në raportimin e aktiviteteve të dyshimta, shkruan Reuters.
Kryetari i Deutsche Bank, Alexander Wynaendts, kishte deklaruar vitin e kaluar se forcimi i kontrolleve të brendshme mbetej një prioritet strategjik, por hetimi i ri tregon se sfidat ligjore për gjigantin bankar gjerman vijojnë ende.
