Presidenti francez Emmanuel Macron deklaroi të mërkurën se përplasja e fundit me Shtetet e Bashkuara mbi Groenlandën përbën “një zgjim strategjik për të gjithë Evropën”, duke folur krah për krah me drejtuesit e Danimarkës dhe të territorit autonom danez.
“Ky zgjim duhet të përqendrohet në afirmimin e sovranitetit tonë evropian, në kontributin tonë për sigurinë në Arktik, në luftën kundër ndërhyrjeve dhe dezinformimit të huaj dhe në luftën kundër ngrohjes globale”, tha Macron në Paris.
Macron priti në Pallatin Élysée kryeministren daneze Mette Frederiksen dhe kryeministrin e Groenlandës Jens-Frederik Nielsen, në një takim që synonte të dërgonte një sinjal të qartë politik të mbështetjes evropiane, në përgjigje të ambicieve ekspansioniste të shprehura nga presidenti i SHBA-së, Donald Trump.
Sipas autoriteteve franceze, tre liderët diskutuan “sfidat e sigurisë në Arktik dhe zhvillimin ekonomik dhe social të Groenlandës, të cilat Franca dhe Bashkimi Evropian janë të gatshëm t’i mbështesin”.
Kryeministrja daneze Mette Frederiksen theksoi se “mendoj se Evropa ka nxjerrë disa mësime gjatë javëve të fundit”, duke vënë në dukje nevojën për një Evropë më të aftë për të mbrojtur veten, sipas Euronews.
Ajo nënvizoi gjithashtu rolin kyç të NATO-s.
“NATO do të ketë një rol të rëndësishëm për të luajtur në Arktik”, tha Frederiksen.
Nga ana e tij, kryeministri i Groenlandës Jens-Frederik Nielsen theksoi dimensionin politik dhe ideologjik të bashkëpunimit me Parisin.
Partneriteti mes Francës dhe Groenlandës, tha ai, “nuk ka të bëjë vetëm me Groenlandën”, por është pjesë e një mbrojtjeje të përbashkët të “vlerave demokratike”.
Kjo shfaqje solidariteti evropian vjen në një kohë kur Franca po përgatitet të forcojë praninë e saj diplomatike në rajon.
Parisi planifikon të hapë një konsullatë në Nuuk, kryeqytetin e territorit gjysmë-autonom danez, më 6 shkurt.
Takimi në Paris është pjesë e një sekuence më të gjerë diplomatike. Ditët e fundit, Frederiksen ka intensifikuar konsultimet evropiane, duke marrë pjesë në një samit mbi bashkëpunimin energjetik dhe të sigurisë në Detin e Veriut në Hamburg, e ndjekur nga një vizitë në Berlin.
Me rreth 57 mijë banorë, Groenlanda mbetet një territor kyç për shkak të pozicionit të saj strategjik dhe burimeve natyrore, në zemër të një rajoni të Arktikut gjithnjë e më shumë të kontestuar.
Donald Trump ka kërcënuar vazhdimisht se do të aneksojë ishullin më të madh në botë, duke përmendur rëndësinë e tij për sigurinë kombëtare të SHBA-së. Ai ka pretenduar gjithashtu, pa paraqitur prova, se nëse Amerika nuk merr kontrollin e Groenlandës, këtë do ta bëjnë Rusia ose Kina.
