Presidentja e përkohshme e Venezuelës, Delcy Rodriguez, u shpreh se i ka ardhur “në majë të hundës” nga urdhrat e Uashingtonit, duke shënuar sfidën e saj të parë publike ndaj Shtëpisë së Bardhë që prej rrëmbimit të udhëheqësit venezuelian Nicolas Maduro nga Shtetet e Bashkuara në fillim të këtij muaji.
Rodriguez mori drejtimin e Venezuelës pas sulmit amerikan dhe rrëmbimit të Maduros më 3 janar. Fillimisht, presidenti i SHBA-së, Donald Trump, deklaroi se Uashingtoni do ta “drejtonte” Venezuelën, por më vonë ai shprehu mbështetje për Rodriguez gjatë periudhës tranzitore.
“Mjaft më me urdhrat e Uashingtonit në lidhje me politikanët në Venezuelë,” u shpreh Rodriguez përpara një grupi punonjësish të industrisë së naftës në Puerto La Cruz, gjatë një aktiviteti të dielën, i transmetuar nga kanali shtetëror Venezolana de Television.
“Le ta lëmë politikën venezueliane të zgjidhë vetë dallimet dhe konfliktet tona të brendshme,” theksoi presidentja në detyrë, duke shtuar se republika ka paguar një çmim shumë të lartë përballë pasojave të fashizmit dhe ekstremizmit në vend.
Presioni i SHBA-së dhe kërkesat e Trump
Pas marrjes së detyrës, Rodriguez deklaroi se asnjë “agjent i huaj” nuk do të kontrollonte Venezuelën apo do ta kthente atë në një “koloni”. Më pas, drejtori i CIA-s, John Ratcliffe, vizitoi Karakasin për t’u takuar me të, me qëllim, sipas raportimeve, përcjelljen e kushteve të Trump-it për përmirësimin e marrëdhënieve dypalëshe. Këto kushte përfshinin ndryshime si në politikat e brendshme ashtu edhe në ato të jashtme të vendit.
Që prej asaj kohe, ajo ka ndërmarrë hapa drejt përmbushjes së kërkesave amerikane, përfshirë:
hapjen e sektorit të naftës venezueliane për kompanitë amerikane;
bashkëpunimin në çështjet e sigurisë.
Trump e vlerësoi Rodriguez-in si një “person fantastik” pas telefonatës së tyre javën e kaluar, duke theksuar “përparimin e jashtëzakonshëm” të arritur pas përmbushjes së kërkesave të SHBA-së dhe duke premtuar një partneritet “spektakolar” në fushën e naftës dhe të sigurisë kombëtare, shkruan Rt.
