Më shumë se 13 mijë fluturime janë anuluar në Shtetet e Bashkuara nga e shtuna deri të hënën, si pasojë e një stuhie dimërore të pazakontë dhe shumë të gjerë, që ka përfshirë pjesën më të madhe të gjysmës lindore të vendit, përcjell DW.
Sipas firmës së analizës së aviacionit Cirium, anulimet dhe vonesat e fluturimeve po i afrohen niveleve të ndërprerjes së parë gjatë pandemisë së koronavirusit. Vetëm të dielën janë anuluar mbi 9 mijë fluturime, ndërsa mbi 4 mijë u anuluan të shtunën.
Shërbimi Kombëtar i Motit (NWS) paralajmëroi se rreth 180 milionë persona, më shumë se gjysma e popullsisë së SHBA-së, janë të ekspozuar ndaj reshjeve të dendura të borës, shiut të akullt dhe ngricave, në një zonë që shtrihet nga Malet Shkëmbore deri në New England.
Meteorologia e NWS, Allison Santorelli, tha se shkrirja e borës dhe akullit do të jetë shumë e ngadaltë, duke e bërë të vështirë rikuperimin e situatës. Sipas parashikimeve, deri në përfundim të stuhisë të hënën në mbrëmje, ajo do të ketë lënë pas një brez reshjesh dimërore mbi 3,200 kilometra, nga New Mexico deri në Maine.
Aeroporte të paralizuara
Ndër aeroportet më të prekura janë:
Anulimi i të gjitha fluturimeve të së shtunës dhe mëngjesit të së dielës në Oklahoma City
Anulimi i rreth 700 fluturimeve nisëse dhe gjysmës së fluturimeve mbërritëse në Dallas–Fort Worth
Ndërprerje të shumta në aeroportet e Chicago, Atlanta, Nashville dhe Charlotte
Anulimi i të gjitha fluturimeve nisëse të së dielës në aeroportin Ronald Reagan Washington National
Mbi 120 mijë familje pa energji
Stuhia ka shkaktuar gjithashtu ndërprerje të energjisë elektrike për mbi 120 mijë familje, kryesisht në Louisiana dhe Texas, ku janë raportuar rreth 50 mijë ndërprerje secili shtet.
Autoritetet paralajmërojnë se dëmet, veçanërisht në zonat e goditura nga akulli, mund të jenë të krahasueshme me ato të një uragani. Meteorologët në Georgia e kanë cilësuar situatën si stuhinë më të rëndë të akullit në mbi një dekadë.
Presidenti amerikan Donald Trump ka miratuar shpalljen e gjendjes së emergjencës për disa shtete, duke hapur rrugën për ndihmë federale përmes Agjencisë Federale të Menaxhimit të Emergjencave (FEMA).
Autoritetet lokale dhe shtetërore u kanë bërë thirrje qytetarëve të qëndrojnë në shtëpi, të shmangin udhëtimet dhe lëvizjet e panevojshme, deri në përmirësimin e kushteve të motit.
