Pronarët e lokalit “Le Constellation”, Jacques Moretti dhe Jessica Moretti, të fotografuar në Sion, Zvicër më 9 janar, janë nën hetim për vrasje nga pakujdesia dhe krime të tjera
Italia protestoi zyrtarisht të shtunën kundër lirimit me kusht të pronarit të një lokali zviceran që u përfshi nga një zjarr vdekjeprurës ditën e Vitit të Ri, dhe tërhoqi ambasadorin e saj në Zvicër, ndërsa vendimi i gjykatës u kritikua në të dyja vendet.
Jacques Moretti dhe bashkëshortja e tij Jessica, pronarë të lokalit “Le Constellation” në Crans-Montana, janë nën hetim për vrasje nga pakujdesia dhe krime të tjera lidhur me zjarrin që la të vdekur 40 persona dhe plagosi mbi 100 të tjerë, shumë prej të cilëve adoleshentë.
Jacques Moretti u ndalua më 9 janar, por u lirua me kusht të premten.
Kryeministrja italiane Giorgia Meloni u shpreh gjatë natës se lirimi i Moretti-t ishte “një fyerje për kujtimin e viktimave… dhe një fyerje për familjet e tyre”.
Gjashtë nga të vdekurit në zjarrin e lokalit ishin italianë, ashtu si edhe 10 prej të lënduarve.
Një deklaratë e qeverisë të shtunën njoftoi se Meloni dhe Ministri i Jashtëm Antonio Tajani udhëzuan ambasadorin e Italisë që të kontaktonte menjëherë Beatrice Pilloud, kryeprokuroren në kantonin Valais të Zvicrës, për të përcjellë “indinjatën e fortë” të Italisë për lirimin e Moretti-t.
Deklarata shtonte se gjykata e kishte marrë vendimin pavarësisht rëndësisë së krimit të pretenduar, rrezikut të arratisjes dhe mundësisë së dëmtimit të provave, shkruan CNN.
“E gjithë Italia po kërkon të vërtetën dhe drejtësinë, dhe po bën thirrje që të merren masa respektuese pas kësaj fatkeqësie, të cilat marrin parasysh plotësisht vuajtjet dhe pritshmëritë e familjeve,” thuhej në deklaratë.
Meloni dhe Tajani urdhëruan gjithashtu ambasadorin Gian Lorenzo Cornado të kthehej në Romë për të përcaktuar hapat e mëtejshëm që do të ndërmerren.
Prokurorja zvicerane Pilloud konfirmoi për agjencinë zvicerane të lajmeve “Keystone SDA” se ishte kontaktuar nga ambasadori italian, por shpjegoi se lirimi i Moretti-t ishte urdhëruar nga një gjykatë e veçantë.
“Nuk dëshiroj të jem përgjegjëse për një incident diplomatik mes dy vendeve tona. Nuk do të dorëzohem para asnjë presioni të mundshëm nga autoritetet italiane, prandaj e këshillova ambasadorin t’u drejtohet autoriteteve politike zvicerane,” tha ajo.
Një zëdhënës i Ministrisë së Punëve të Jashtme të Zvicrës nuk ishte menjëherë i disponueshëm për koment.
