Presidenti Donald Trump u zotua të shtunën të zbatojë një valë tarifash në rritje ndaj aleatëve evropianë derisa Shtetet e Bashkuara të lejohen të blejnë Groenlandën, duke përshkallëzuar një debat mbi të ardhmen e ishullit të madh arktik të Danimarkës.
Në një postim në Truth Social, Trump tha se tarifat shtesë prej 10% të importit do të hyjnë në fuqi më 1 shkurt për mallrat nga Danimarka, Norvegjia, Suedia, Franca, Gjermania, Holanda, Finlanda dhe Britania e Madhe – të gjitha tashmë të nënshtruara ndaj tarifave të vendosura nga Trump.
Këto tarifa do të rriten në 25% më 1 qershor dhe do të vazhdojnë derisa të arrihet një marrëveshje që SHBA-të të blejnë Groenlandën, shkroi Trump.
Trump ka këmbëngulur vazhdimisht se nuk do të pranojë asgjë më pak sesa pronësinë e Groenlandës, një territor autonom i Danimarkës. Udhëheqësit e Danimarkës dhe Groenlandës kanë këmbëngulur se ishulli nuk është në shitje dhe nuk duan të jenë pjesë e Shteteve të Bashkuara, shkruan Reuters.
Presidenti ka thënë vazhdimisht se Groenlanda është jetike për sigurinë e SHBA-së për shkak të vendndodhjes së saj strategjike dhe depozitave të mëdha minerale, dhe nuk e ka përjashtuar përdorimin e forcës për ta marrë atë. Kombet evropiane këtë javë dërguan personel ushtarak në ishull me kërkesë të Danimarkës.
“Këto vende, të cilat po luajnë këtë lojë shumë të rrezikshme, kanë vënë në lojë një nivel rreziku që nuk është i qëndrueshëm”, shkroi Trump.
“Shtetet e Bashkuara të Amerikës janë menjëherë të hapura për negociata me Danimarkën dhe/ose cilindo nga këto vende që kanë vënë kaq shumë në rrezik, pavarësisht gjithçkaje që kemi bërë për ta, përfshirë mbrojtjen maksimale, gjatë kaq shumë dekadave“, tha ai.
Protestuesit në Danimarkë dhe Groenlandë demonstruan të shtunën kundër kërkesave të Trump dhe kërkuan që territori të lihet të përcaktojë vetë të ardhmen e tij.
Vendet e emëruara nga Trump të shtunën kanë mbështetur Danimarkën, duke paralajmëruar se pushtimi ushtarak amerikan i një territori në NATO mund të rrëzojë aleancën ushtarake që udhëheq Uashingtoni.
“Njoftimi i presidentit vjen si një surprizë,” tha në një deklaratë Ministri i Jashtëm i Danimarkës Lars Lokke Rasmussen.
