Agjentët e FBI-së kontrolluan shtëpinë e një gazetareje të Washington Post të mërkurën, si pjesë e një hetimi mbi ndarjen e informacioneve sekrete qeveritare, thanë zyrtarët. Kjo lëvizje, sipas mbrojtësve të shtypit, kërcënon lirinë gazetarisë.
Gazetarja, Hannah Natanson, ka mbuluar fushatën e Presidentit Donald Trump për pushimin nga puna të qindra mijëra punonjësve federalë dhe zhvendosjen e punonjësve të mbetur drejt zbatimit të agjendës së tij.
Prokurorja e Përgjithshme, Pam Bondi, tha se agjentët federalë ekzekutuan kontrollin me kërkesë të Departamentit të Mbrojtjes. Departamentit i Drejtësisë i administratës Trump vitin e kaluar shfuqizoi një politikë që u ndalonte prokurorëve sekuestrimin e të dhënave të gazetarëve në shumicën e rrethanave.
Mbrojtësit e lirisë së shtypit e quajtën kontrollin një përshkallëzim dramatik në sulmet e vazhdueshme të administratës Trump ndaj mediave të lajmeve.
Lidhja me rastin e Perez-Lugones
The Post raportoi se Natanson ishte e pranishme gjatë kontrollit të shtëpisë së saj në Virxhinia. Kontrolli ishte i lidhur me një çështje penale kundër Aurelio Perez-Lugones, një specialist teknologjie për një kontraktor të qeverisë amerikane, i cili u akuzua javën e kaluar për mbajtje të paligjshme të informacioneve të mbrojtjes kombëtare.
Sipas padisë penale, prokurorët pretendojnë se Perez-Lugones ka bërë “screenshots” të raporteve të klasifikuara të inteligjencës dhe i ka printuar ato dokumente. Hetuesit gjetën gjithashtu dokumente të shënuara si “sekret” në një kuti ushqimi në makinën e tij dhe në bodrumin e shtëpisë, shkruan Reuters.
Gazetarja nuk është objektivi i hetimit
The Post deklaroi në platformën X se hetuesit i kishin thënë Natanson-it se ajo nuk ishte objektivi kryesor i hetimit. Megjithatë, Prokurorja Bondi shkroi në X: “Administrata Trump nuk do të tolerojë rrjedhjet e paligjshme të informacioneve të klasifikuara që përbëjnë një rrezik të rëndë për sigurinë kombëtare”.
Reagimet
“Kontrollet në redaksitë e lajmeve dhe ndaj gazetarëve janë tipare të regjimeve joliberale dhe ne duhet të sigurojmë që këto praktika të mos normalizohen këtu,” tha Jameel Jaffer, drejtor ekzekutiv i Institutit Knight për Amendamentin e Parë.
Ekspertët ligjorë theksuan se bastisjet në shtëpitë e gazetarëve janë jashtëzakonisht të rralla në historinë e SHBA-së. Sekuestrimi i pajisjeve elektronike të Natanson mund t’u japë hetuesve akses në materiale të ndjeshme që nuk kanë lidhje me çështjen në fjalë, duke krijuar një efekt frenues për burimet konfidenciale në të ardhmen.
Nën pronësinë e Jeff Bezos, Washington Post ka zhvendosur seksionin e saj të opinioneve drejt së djathtës, por mbulimi i lajmeve mbetet i paanshëm. Amazon, e themeluar nga Bezos, dhuroi 1 milion dollarë për inaugurimin e Trump vitin e kaluar.
