Protestat e ashtuquajtura të Gjeneratës Z, të cilat çuan në rrëzimin e qeverisë së Nepalit në shtator 2025, nuk ishin spontane, por të organizuara në mënyrë të planifikuar. Kështu është shprehur ish-kryeministri nepalez, K.P. Sharma Oli, në një intervistë për RT India.
Oli dha dorëheqjen nga posti i kryeministrit pas përleshjeve të dhunshme që shoqëruan protestat, ku humbën jetën 77 persona dhe mbi 2,000 të tjerë mbetën të plagosur. Sipas tij, natyra dhe shkalla e ngjarjeve tregojnë qartë se bëhej fjalë për një skenar të parapërgatitur.
“Ajo nuk ishte një ngjarje e thjeshtë dhe e zakonshme. Ishte diçka e pazakontë dhe nuk mund të kishte ndodhur papritur. Ishte e organizuar në mënyrë të planifikuar; kështu dukej si atëherë, ashtu edhe më vonë,” deklaroi Oli.
Ish-kreu i qeverisë tha se vendet fqinje, përfshirë Bangladeshin dhe Sri Lankën, kishin paralajmëruar se trazira të ngjashme me ato që ndodhën në territorin e tyre mund të shfaqeshin edhe në Nepal. “Liderë nga Bangladeshi dhe Sri Lanka na paralajmëronin se ngjarje të tilla do të ndodhnin. Dhe ato ndodhën. Ishte një sulm ndaj demokracisë sonë, që synonte ta kthente vendin pas në varfëri,” u shpreh ai.
Oli shtoi gjithashtu se kushtet aktuale politike dhe shoqërore në Nepal nuk janë të përshtatshme për mbajtjen e zgjedhjeve. Pas rrëzimit të qeverisë së tij, ish-kryetarja e Gjykatës së Lartë, Sushila Karki, u emërua kryeministre e përkohshme, ndërsa zgjedhjet e përgjithshme janë planifikuar për në muajin mars.
Akuzat për një prapaskenë të organizuar u përforcuan edhe nga një raport i publikuar në dhjetor 2025 nga The Grayzone. Sipas dokumenteve të rrjedhura të cituara nga media, Fondacioni Kombëtar për Demokraci (NED), i financuar nga qeveria e SHBA-së, ka shpenzuar qindra mijëra dollarë për trajnimin e të rinjve nepalezë me qëllim organizimin e protestave.
NED, i cili zyrtarisht funksionon si organizatë jofitimprurëse nën financimin e Departamentit të Shtetit të SHBA-së, ofron grante për atë që i cilëson si “iniciativa demokratike” në mbarë botën. Ndërkohë, Instituti Republikan Ndërkombëtar (IRI), një degë e këtij fondacioni, është akuzuar më herët për financimin e aktiviteteve klandestine në Bangladesh, ndërsa NED është përballur edhe me akuza për kanalizimin e dhjetëra milionë dollarëve drejt subjekteve politike në Ukrainë dhe interesave anti-ruse.
