Policia spanjolle ka realizuar sekuestrimin më të madh të kokainës në det, pasi zbuloi gati 10 tonë të lëndës narkotike të fshehur mes një ngarkese kripe në një anije tregtare pranë Ishujve Kanarie.
Hetuesit dhe prokurorët antidrogë, të cilët po ndiqnin një grup të dyshuar kriminal multinacional që dyshohet se eksportonte “sasi gjigante” të kokainës nga Amerika e Jugut drejt Europës, kishin identifikuar një anije të dyshimtë që ishte nisur nga Brazili, bëri të ditur Policía Nacional të hënën, sipas The Guardian.
Javën e kaluar, oficerët e grupit elitar të operacioneve speciale të policisë hipën në anije rreth 332 milje (535 km) larg Ishujve Kanarie dhe sekuestruan gati 300 bale kokainë, të cilat ishin groposur brenda një sasie të madhe kripe në hambar.
Trembëdhjetë persona u arrestuan dhe anija, e cila kishte mbetur pa karburant, u tërhoq drejt portit të Santa Cruz de Tenerife.
Pamjet e ndërhyrjes tregojnë oficerë që përdorin lopata për të zbuluar qeset e droguara të futura thellë në masën e kripës.
Operacioni, i koduar “White Tide”, u zhvillua në bashkëpunim me policinë federale të Brazilit, Agjencinë Amerikane të Luftës kundër Drogës (DEA), Agjencinë Kombëtare të Krimit të Mbretërisë së Bashkuar (NCA), si dhe autoritetet franceze e portugeze.
Në deklaratën e policisë thuhet: “Falë këtij bashkëpunimi të përbashkët, oficerët e Policía Nacional rikuperuan 9,994 kg kokainë të paketuar në 294 blloqe, të cilat ishin fshehur mes tonëve të kripës që transportonte anija, si dhe një armë zjarri që banda përdorte për të mbrojtur ngarkesën.”
Më tej theksohej: “Kjo përbën një goditje vendimtare ndaj rrjeteve kriminale ndërkombëtare të përfshira në trafikun detar të kokainës, duke treguar efektivitetin e bashkëpunimit ndërkombëtar të policisë në luftën kundër trafikut global të drogës – dhe duke nënvizuar edhe një herë aftësinë e Policía Nacional për të goditur me sukses organizatat kriminale me shtrirje globale.”
Rekordi i mëparshëm për sekuestrimin më të madh të kokainës nga policia spanjolle në det ishte ai i vitit 1999, kur u kapën 7.5 tonë në një anije peshkimi.
Në vitin 2024, policia dhe doganat spanjolle ndaluan ngarkesën më të madhe të kokainës që ishte regjistruar ndonjëherë në vend, duke sekuestruar mbi 13 tonë të drogës të fshehura në një kontejner me banane të ardhur nga Ekuadori.
Gjatë vitit 2024, autoritetet spanjolle sekuestruan gjithsej 123 tonë kokainë, një rritje nga 118 tonë në 2023 dhe 58 tonë në 2022.
