SHBA-të u kanë paraqitur Izraelit dhe Sirisë një propozim të ri për një pakt sigurie mes tyre, i cili përfshin krijimin e një zone të përbashkët ekonomike në dy anët e kufirit, tha një zyrtar amerikan për Axios.
Administrata Trump po kërkon me ngulm një marrëveshje për të stabilizuar situatën e sigurisë përgjatë kufirit Izrael-Siri, gjë të cilën zyrtarët e shohin si hapin e parë drejt një normalizimi diplomatik në të ardhmen.
Propozimi erdhi gjatë disa orëve bisedimesh në Paris të martën, gjatë të cilave Izraeli dhe Siria ranë dakord të përshpejtojnë ritmin e negociatave në vazhdim, thanë zyrtarë izraelitë dhe amerikanë me njohuri të drejtpërdrejta. I dërguari i SHBA-së për Sirinë, Tom Barrack, dhe këshilltarët e presidentit Trump, Steve Witkoff dhe Jared Kushner, ndërmjetësuan mes palëve.
“Bisedimet ishin shumë të mira dhe të sinqerta. Tema jonë ishte bashkëpunimi në vend të kundërshtimit,” tha zyrtari amerikan.
Një zyrtar i lartë izraelit tha se palët kishin rënë dakord të mbanin takime më të shpeshta dhe të ndërmerrnin masa për rritjen e besimit.
“Të dy vendet shprehën dëshirën për të arritur një marrëveshje sigurie nën vizionin e presidentit Trump për Lindjen e Mesme.”
Ky ishte raundi i pestë i bisedimeve të ndërmjetësuara nga SHBA, por i pari në dy muaj pasi bisedimet kishin hyrë në një bllokadë me dallime të mëdha që ende mbeten. Presidenti Trump i kërkoi kryeministrit izraelit Benjamin Netanyahu të kthehej në tryezë gjatë takimit të tyre javën e kaluar në Florida.
Një zyrtar amerikan tha se gjatë takimit në Paris, SHBA propozoi një “qelizë” të përbashkët SHBA-Izrael-Siri në Aman të Jordanisë, për të mbikëqyrur gjendjen e sigurisë në Sirinë Jugore dhe për të pritur bisedimet e mëtejshme mbi çmilitarizimin dhe tërheqjen e forcave izraelite.
“Ne ngrijmë të gjitha veprimtaritë ushtarake në të dyja anët aty ku janë, derisa të përcaktojmë hollësitë në qelizën e përbashkët,” tha zyrtari amerikan, duke përshkruar planin e SHBA-së. Një zyrtar amerikan tha se secila palë do dërgonte përfaqësues në këtë qelizë për t’u përqendruar në bisedimet diplomatike, lidhjet ushtarake, të inteligjencës dhe ato tregtare.
Propozimi për një zonë ekonomike të çmilitarizuar i ngjan një propozimi të ngjashëm që administrata Trump bëri për të formuar një zonë të tillë në Donbas, për të zgjidhur çështjen territoriale midis Ukrainës dhe Rusisë, shkruan Axios.
“Kjo zonë ekonomike do përfshijë parqe eolike, bujqësinë, malin më të mirë për ski në Lindjen e Mesme dhe komunitetin Druze që shquhet për mikpritje,” tha zyrtari amerikan. Ai shtoi se partnerët rajonalë janë zotuar tashmë për ta financuar atë, por kundërshtoi të emëronte shtetet konkrete.
Ekipi izraelit përfshinte ambasadorin e Izraelit në Uashington, Yechiel Leiter; sekretarin ushtarak të Netanyahut, Roman Gofman; dhe ushtruesin e detyrës së Këshilltarit të Sigurisë Kombëtare, Gil Reich. Ekipi sirian përfshinte Ministrin e Jashtëm, Asaad al-Shaibani dhe Shefin e Inteligjencës, Hussein Salameh.
