Kalifornia është goditur nga një tjetër stuhi e fuqishme ditën e Krishtlindjes, pas disa ditësh reshjesh të dendura që kanë shkaktuar rrëshqitje dheu dhe përmbytje të menjëhershme në disa zona të shtetit, përcjell DW.
Autoritetet kanë lëshuar paralajmërime për evakuim dhe alarme për dallgë të larta, veçanërisht në Wrightwood, një qytet malor rreth 130 kilometra në verilindje të Los Anxhelosit, ku një ditë më parë u shpëtuan persona të bllokuar në automjete pas një rrëshqitjeje dheu.
Stuhia po ushqehet nga fenomeni atmosferik i njohur si “Pineapple Express”, i cili sjell masa të mëdha lagështie nga Hawaii drejt Bregut Perëndimor të SHBA-së. Sipas meteorologëve, në vetëm pak ditë pritet të bjerë një sasi shiu e barabartë me reshjet e disa muajve.
Si pasojë e motit ekstrem, mbi 70 mijë banorë kanë mbetur pa energji elektrike, ndërsa të paktën dy persona kanë humbur jetën si pasojë e reshjeve të forta dhe erërave të fuqishme. Shërbimi Kombëtar i Motit paralajmëron për rrezik të lartë për përmbytje të shpejta, fryrje të lumenjve dhe rrjedhje mbetjesh, veçanërisht në zonat e prekura më herët nga zjarret.
Autoritetet kanë shpallur gjendjen e emergjencës në disa qarqe, përfshirë Los Anxhelosin, ndërsa u bëhet thirrje qytetarëve të shmangin lëvizjet e panevojshme dhe të ndjekin udhëzimet e emergjencës, pasi reshjet dhe kushtet e rrezikshme pritet të vijojnë edhe në ditët në vijim.
