Korporata evropiane e hapësirës ajrore, Airbus, ka vendosur të largojë sistemet kritike digjitale nga shërbimet “cloud” të Google. Drejtuesit e kompanisë thonë se vendimi është nxitur nga shqetësimet për sigurinë dhe sovranitetin e të dhënave, të lidhura me juridiksionin e SHBA-së mbi informacionet e ndjeshme industriale.
Vendimi vjen në një kohë kur Google po përballet me një padi kolektive në SHBA për shkelje të pretenduara të privatësisë lidhur me asistentin e tij me inteligjencë artificiale, Gemini. Padia pretendon se mjeti u aktivizua në heshtje në Gmail, Chat dhe Meet në tetor, duke i dhënë Google qasje në email-e, attachment (bashkëngjitje) dhe thirrje video pa pëlqimin e përdoruesit, sipas Bloomberg. Google i ka mohuar akuzat.
Airbus po përgatitet tani të hapë një tender për një kontratë të madhe për të emigruar ngarkesat e punës me rëndësi kritike në një “cloud” evropian digjitalisht sovran. Kompania, e cila aktualisht përdor Google Workspace, planifikon të zhvendosë sistemet kryesore pas konsolidimit të pronave të saj të qendrave të të dhënave, shkruan Rt.
Ndryshimi do mbulonte sistemet bazë, duke përfshirë prodhimin, menaxhimin e biznesit dhe të dhënat e projektimit të avionëve. Airbus ka vlerësuar se ekziston vetëm një mundësi prej 80% për të gjetur një ofrues evropian të aftë për të përmbushur kërkesat e tij teknike dhe ligjore.
Tenderi, i vlerësuar në më shumë se 50 milionë euro, pritet të hapet në fillim të janarit, me një vendim që pritet para verës. Airbus, i cili ka udhëhequr garën globale të porosive të avionëve për gjashtë vitet e fundit, pranoi në fillim të këtij muaji se rivali amerikan Boeing ka të ngjarë ta kalojë këtë vit.
Kreu ekzekutiv Guillaume Faury tha se Boeing përfitoi nga mbështetja politike gjatë negociatave tregtare që përfshinin blerje të mëdha avionësh.
