Presidenti ukrainas, Volodymyr Zelenskyy, ka kërkuar nga Evropa dhe Shtetet e Bashkuara garanci të detyrueshme ligjore sigurie për Ukrainën, në kuadër të diskutimeve për një marrëveshje paqeje me Rusinë, përcjell DW.
Pas takimit me kryeministrin e përkohshëm holandez, Dick Schoof, në Hagë, Zelenskyy tha se Ukrainës i nevojiten angazhime konkrete për mbrojtje, veçanërisht nëse arrihet një armëpushim, duke theksuar se pa anëtarësim në NATO, vendi ka nevojë për mekanizma të qartë sigurie.
Ai përmendi gjithashtu diskutimet në Berlin ku vendet pjesëmarrëse premtuan kontribute konkrete për sigurinë e Ukrainës, duke shtuar se detajet për forcën shumëkombëshe të sigurisë do të bëhen publike vetëm pas arritjes së një armëpushimi.
