Zyra e Kombeve të Bashkuara për Koordinimin e Çështjeve Humanitare (OCHA) njoftoi të hënën se do të ulë apelimin e saj vjetor për ndihma humanitare, duke kërkuar 23 miliardë dollarë (rreth 19.7 miliardë euro) për vitin 2026. Apelimi vjen pasi sektori i ndihmës dhe zhvillimit ka pësuar goditje të mëdha nga ulja e financimeve nga Shtetet e Bashkuara, ndërsa punonjësit humanitarë janë përballur gjithnjë e më shumë me sulme në zonat e konflikteve, përcjell DW.
Kjo shifër është e nevojshme për të shpëtuar 87 milionë jetë, tha kreu humanitar i OKB-së, Tom Fletcher. “Ne drejtojmë ambulancën drejt zjarrit në emrin tuaj. Por tani na kërkohet edhe të shuajmë zjarrin. Dhe nuk ka ujë të mjaftueshëm në rezervuar. Dhe na qëllojnë,” tha Fletcher, duke përshkruar vështirësitë me të cilat përballen punonjësit humanitarë.
Një vit më parë, OKB-ja kërkonte 47 miliardë dollarë, por mori vetëm 12 miliardë, “shuma më e ulët në një dekadë,” sipas Fletcher. Tani, Organizata synon të zbatojë një plan që përqendrohet në vendet ku ndihma është më e nevojshme dhe ku jetët janë më të rrezikuara. Apeli i ri është “i fokusuar drejt shpëtimit të jetëve aty ku goditjet janë më të rënda: lufta, katastrofat klimatike, tërmetet, epidemitë dhe dështimet e korrave,” shtoi Fletcher.
OCHA identifikoi tre zonat kryesore që kanë nevojë emergjente për ndihmë në 2026: 4.1 miliardë dollarë për 3 milionë njerëz në territoret palestineze, 2.9 miliardë dollarë për 20 milionë njerëz në Sudan dhe 2.8 miliardë dollarë për 8.6 milionë njerëz në Siri. Ukraina, Haiti dhe Myanmar janë gjithashtu ndër vendet me prioritet të lartë për ndihma.
Fletcher gjithashtu theksoi se politikanët ekstremistë shpesh i mashtrojnë qytetarët duke thënë se taksat e tyre shkojnë kryesisht për ndihmat humanitare, gjë që është larg realitetit. Ai shtoi se vetëm 1% e shpenzimeve globale për mbrojtje — që vitin e kaluar arritën 2.7 trilionë dollarë — do të mjaftonte për të mbuluar nevojat humanitare më të ngutshme.
