Kryetari i Partisë Demokratike, Sali Berisha, deklaroi gjatë mbledhjes së grupit parlamentar demokrat se aferat që lidhen me ministren Belinda Balluku arrijnë në vlera prej miliarda dollarësh.
Ai tha se Balluku, e cila është e pandehur nga SPAK, ka administruar rreth 12 miliardë euro fonde publike në infrastrukturë gjatë qeverisjes së saj.
Berisha akuzoi se te afera e tunelit të Llogarasë, Balluku dhe kryeministri Edi Rama janë të lidhur drejtpërdrejt dhe se komunikimet e ministrisë me ish-drejtorin Evis Berberi i atribuohen më shumë vetë Ramës.
“Lubia si ministre ka administruar 12 miliardë euro dhe në çdo lloj përllogaritje mbi 10 milionë janë të zhdukura pa nam e pa nishan. Në 12 vite taksa, djersë e mund të qytetarëve shqiptarë, në total prej 67 miliardësh sipas KLSH dhe Bankës Botërore, është përllogaritur se 90 për qind e tyre janë zhdukur. Këto janë grabitje e plaçkitje” – tha ai.
Duke iu rikthyer çështjes së tunelit të Llogarasë, Berisha u shpreh se përgjegjësi i parë i aferës është kryeministri.
“Tuneli i Llogarasë ka hajdut të parë Ramën. Askush të mos mendojë që Lubia është ndarë duar bosh, as ajo as ata që ka patrulluar ajo” – deklaroi Berisha.
Sipas tij, ministrja ka zbatuar urdhra që vinin nga kreu i qeverisë.
“Lubia nuk ka bërë asgjë tjetër veçse ka zbatuar porositë e tij. Mesazhet me Evis Berberin janë të Ramës më shumë” – u shpreh ai.
Berisha tha se provat e mbledhura në këtë hetim janë voluminoze dhe të rëndësishme.
“Janë 4 telefona, mbi 2700 mesazhe në Telegram, Signal, WhatsApp. Vetëm në një telefon ka 407 minuta video, pa llogaritur fotografitë” – theksoi ai.
