Prokurorët italianë kanë vënë në shënjestër një aleancë të supozuar sekrete në zemër të sektorit financiar të vendit, duke pretenduar se investitorë miliarderë komplotuan me shefin e bankës huadhënëse “Monte dei Paschi di Siena” (MPS) për të blerë një rival dhe, përfundimisht, për të marrë kontrollin e kompanisë së sigurimeve “Generali”.
Një urdhërkontrolli e sekuestrimi prej 35 faqesh, i parë nga Financial Times, pretendon se aksionerët kryesorë në bankën e mbështetur nga shteti, punuan me shefin e saj ekzekutiv për të organizuar një blerje prej 17 miliardë eurosh të bankës prestigjioze milaneze “Mediobanca”.
Por, sipas prokurorëve, objektivi i vërtetë nuk ishte “Mediobanca”, por kompania e sigurimeve në të cilën “Mediobanca” është aksioneri më i madh: “Generali”.
Transkriptet nga përgjimet e hollësishme në urdhër përfshijnë biseda të supozuara ndërmjet shefit ekzekutiv të MPS, Luigi Lovaglio, dhe investitorit të pasur Francesco Gaetano Caltagirone, si dhe komente të shefit ekzekutiv të tanishëm të “Mediobanca”, Alessandro Melzi d’Eril.
Duke folur në prill pas një lëvizjeje të ndërlikuar mbrojtëse të blerjes nga “Mediobanca”, e cila përfshinte shitjen e aksioneve të bankës te “Generali” për të financuar një ofertë në fund të fundit të pasuksesshme për “Banca “Generali””, transkriptet tregojnë Melzi d’Erilin duke u shprehur hapur.
“Askush nuk do t’ia dijë për “Mediobanca”-n pasi të lëshojë “Generali”-n,” citojnë prokurorët. Melzi d’Eril do vendosej më vonë si shef ekzekutiv i “Mediobanca” pas blerjes së saj nga MPS.
Melzi d’Eril dhe “Generali” nuk pranuan të komentojnë.
Prokurorët pretendojnë se diskutimet e përcaktuara në urdhër tregojnë një komplot të fshehtë, ku MPS u përdor si një mjet për të ekzekutuar një plan më të gjerë për të marrë përfundimisht kontrollin e “Generali”.
“Generali” është një nga mbajtësit më të mëdhenj të borxhit sovran italian, duke e bërë atë një lojtar kyç në industrinë e shërbimeve financiare të vendit. Shefi ekzekutiv i kompanisë së sigurimeve, Philippe Donnet, ka qenë prej kohësh një objektiv i dy investitorëve miliarderë që ndërtuan një rrjet aksionesh në të gjithë sektorin e shërbimeve financiare të Italisë.
Caltagirone, një manjat roman i ndërtimit, dhe “Delfin”, kompania holding e familjes miliardere Del Veçhio, fituan aksione thelbësore në MPS gjatë vitit të kaluar – mbi aksionet e tyre ekzistuese si në “Mediobanca” ashtu edhe në “Generali”.
Lovaglio, Caltagirone dhe kryetari i “Delfin”, Francesco Milleri, janë nën hetim për manipulim tregu dhe pengim të funksioneve mbikëqyrëse. Të gjithë mohojnë çdo keqbërje.
Urdhri i kontrollit dhe sekuestrimit pretendon se “Delfin” dhe Caltagirone bashkërenduan përpjekjet dhe vendimet e investimit për vite me radhë pa informuar tregun dhe rregullatorët, duke rekrutuar përfundimisht shefin ekzekutiv të MPS, Lovaglio, për të ekzekutuar planin e tyre.
Caltagirone dhe “Delfin” janë përpjekur vazhdimisht ta heqin Donnet-in nga pozita e tij te “Generali”. Investitorët besojnë se CEO ka penguar zgjerimin e “Generali”-t dhe ka kufizuar rritjen e tij në krahasim me siguruesit e tjerë kryesorë të Evropës, “Axa” dhe “Zurich”.
Rebelët shpesh kanë kërkuar të theksojnë rrezikun e një blerjeje të kompanisë së sigurimeve nga njëri prej të dyve për të justifikuar kundërshtimin e tyre ndaj francezit. Megjithatë, pa mbështetjen e aksionarit më të madh të “Generali”-t, përpjekjet e tyre dështuan.
Blerja e “Mediobanca”-s nga MPS, e cila u përfundua këtë vjeshtë, ka larguar një nga mbështetësit kryesorë të Donnet-it, shefin ekzekutiv të bankës milaneze, Alberto Nagel, duke e bërë bosin e sigurimeve të cenueshëm ndaj përpjekjeve të miliarderëve për ta rrëzuar atë.
Lovaglio, “Delfin” dhe Caltagirone kanë mohuar gjithmonë se blerja e “Mediobanca”-s ishte një strategji për të instaluar përfundimisht një shef ekzekutiv te “Generali”, të cilin ata e konsiderojnë miqësor.
“Mediobanca”, “Delfin” dhe Caltagirone zotërojnë një aksion të kombinuar në “Generali” prej afërsisht 30 për qind, pragu në të cilin ata do kërkohej të bënin një ofertë blerjeje.
Shefi i MPS i tha FT më herët këtë vit se ai fillimisht mendoi për blerjen e “Mediobanca”-s në vitin 2022, pasi huadhënësi lëshoi një thirrje për para. Në paraqitje të shumta publike, ai gjithashtu hodhi poshtë sugjerimet se oferta e blerjes kishte qenë ideja e Caltagirone-s dhe tha se një aksion në “Generali” ishte “e këndshme për ta pasur, por jo vendimtare” për MPS.
“Ambicia jonë e vetme është të bëhemi grupi i tretë bankar i vendit së bashku me “Mediobanca”-n,” tha Lovaglio në një konferencë në Londër në mars, një pozicion që ai e përsëriti tek rregullatorët italianë në maj.
Por dokumentet e prokurorëve përmbajnë transkripte të thirrjeve të përgjuara në të cilat Lovaglio duket se lavdëron miliarderin për konceptimin e lojës së “Mediobanca”-s dhe thekson rëndësinë strategjike të “Generali”-t.
“Ti ishe inxhinieri i vërtetë, unë vetëm e ekzekutova detyrën… ti trillove diçka perfekte, kështu që bravisimo për idenë,” citohet të ketë thënë Lovaglio për lëvizjen e “Mediobanca”-s në një telefonatë të përgjuar me Caltagirone në prill. Caltagirone nuk pranoi të komentojë.
Lovaglio citohet gjithashtu duke pyetur Caltagirone nëse do “bënin fazën 2” të projektit – diçka që prokurorët thanë se i referohej një plani për të marrë kontrollin e “Generali”-t, por që njerëzit e njohur me bisedën thanë se i referohej thjesht përfundimit të ofertës së “Mediobanca”-s.
Një herë tjetër, Lovaglio thuhet se e ka qetësuar Caltagirone kur ai shprehu kundërshtime ndaj ofertës së propozuar të “Mediobanca”-s për Banca “Generali” – një degë e kompanisë së sigurimeve – e cila do rezultonte në shitjen e aksioneve të bankës milaneze në “Generali” dhe ndoshta do e nxirrte “Mediobanca”-n jashtë mundësive të MPS.
“Generali” është strategjik që në fillim,” tha Lovaglio, sipas transkripteve. Ai vazhdoi të shpjegojë se ishte përpjekur të ulte rëndësinë e “Generali”-t në publik për të shmangur akuzat për nisjen e ofertës së “Mediobanca”-s si një mënyrë për të synuar kompaninë e sigurimeve.
Një person i njohur me pozicionin e “Delfin” tha se prioriteti i tij kishte qenë gjithmonë “Mediobanca”, jo “Generali”. Një zëdhënës i MPS nuk pranoi të komentojë për deklaratat e supozuara të Lovaglio-s.
Hetimi mund ta bëjë më të vështirë për investitorët ta rrëzojnë Donnet-in para fundit të mandatit të tij në vitin 2027 dhe gjithashtu do ndërlikonte integrimin e “Mediobanca”-s nga MPS.
Hetimi ngre gjithashtu pyetje rreth hapave të ardhshëm nga organet e mbikëqyrjes italiane dhe evropiane.
Banka Qendrore Evropiane në qershor miratoi blerjen e “Mediobanca”-s nga MPS, pavarësisht kundërshtimeve nga banka milaneze se aksionerët e saj kishin vepruar në bashkëpunim. Ankesa të ngjashme ishin dorëzuar edhe tek rregullatorët italianë.
Qeveria italiane, e cila nuk është pjesë e hetimit, ende zotëron një aksion prej pesë për qind në MPS, të cilën e kishte shtetëzuar në vitin 2017. Në nëntor 2024, ajo shiti një aksion prej 15 për qind te “Delfin”, Caltagirone dhe banka lokale huadhënëse Banco BPM në një transaksion që gjithashtu po shqyrtohet nga prokurorët.
Konflikti i shefit të “Generali”-t, Donnet, me “Delfin” dhe Caltagirone arriti në derën e qeverisë italiane në fund të vitit të kaluar, kur ai kërkoi një lidhje menaxhimi të aseteve me “Natixis” të Francës, sipas njerëzve të shumtë të njohur me çështjen.
Zyrtarët kishin frikë se sipërmarrja e përbashkët ndërkufitare mund ta ekspozonte vendin ndaj rreziqeve financiare, dhe marrëveshja “Natixis” – “Generali” dukej se ishte në vështirësi.
Megjithatë, me disa nga lojtarët kryesorë tani nën hetim, ai pozicion mund të ndryshojë, duke hapur mundësinë e një vale të re marrëveshjesh dhe paqëndrueshmërie në financat italiane.
VINI RE: Ky material është pronësi intelektuale e Financial Times
Përgatiti për Hashtag.al, Klodian Manjani
