Përfaqësuesja e Lartë e BE-së, Kaja Kallas, tha se huaja e riparimeve për Ukrainën do të tregojë se Evropa po ndërmerr hapa të fortë dhe të besueshëm për t’i dhënë fund luftës së Rusisë dhe do t’i japë BE-së më shumë peshë në negociata. Sipas saj, skema dërgon tre mesazhe: mbështetje për Ukrainën, presion ndaj Moskës dhe sinjal të qartë për Uashingtonin, përcjell Euronews.
Huaja parashikon përdorimin e aseteve të ngrira të Bankës Qendrore Ruse për t’i dhënë Ukrainës një kredi me interes zero, të cilën vendi do ta kthente vetëm nëse Rusia pranon të paguajë dëmet e luftës. Por Belgjika, që mban shumicën e aseteve në Euroclear, vazhdon të kundërshtojë fort, duke paralajmëruar rreziqe të mëdha financiare dhe ndikim negativ në përpjekjet diplomatike për paqe.
Pavarësisht mbështetjes së gjerë në BE, kundërshtimi belg ka krijuar një bllokim të ndërlikuar. Nëse huaja dështon, BE do të duhet të gjejë të paktën 45 miliardë euro të tjera për të mbështetur Ukrainën në vitin 2026. Zyrtarët europianë po shqyrtojnë një plan të përkohshëm financimi, ndërsa presioni rritet nga FMN-ja dhe aleatët perëndimorë.
Kallas u shpreh se shqetësimet e Belgjikës mund të adresohen dhe se BE duhet të ecë përpara me skemën.
